【代糖故系列】《她被寄宿到屋邨男孩的家中》: K61

Q：「鍾唔鍾意呀？有無感覺到啲乜嘢？」
蚊：「我感覺到個世界係粉紅色㗎！」唔…好…啦…
我：「呢枝野噴咗會唔知醜㗎，妳望下個盒寫乜。」
蚊：「我識㗎！Shy係怕醜咁解！」可以老懷安慰咯…
Q：「等等，我而家入去廚房攞殺他死先。」
我：「Sorry，呢間屋嘅殺他死係昆蟲酒店嚟。」
Q：「啱呀，我諗住打開佢黐落你塊面度。」咪咁恐怖啦，雖然可能因為呢個單位無啖好食所以無乜蟲患，但我都唔太清楚入面有無收獲…如果要我同殺蟲水二揀一呢…
呢個抉擇可以媲美俾男子破自己菊花處…
搞咗一輪，我帶住兩個香噴噴嘅女仔一齊出街，應該話…我只係好似個隨從咁跟佢哋行街。
講商場嘅話，九龍區係十分之多，尤其係好多新嘅大型屋苑都會包埋大商場，例如南昌嘅Vcity。但多還多，而家就連小學生都知道網購會比實體店平，所以好多時大商場就成為咗我哋嘆冷氣流離浪蕩無所事事嘅地方，除咗班女神成日去嘅K11呢啲賺到笑嘅商場之外，其實死場都有好多㗎，例如街知巷聞嘅九龍城廣場，未救返生之前嘅旺角家樂坊，而Mikiki因為交通問題同位於工廠區，一大棟新簇簇嘅商場從來都係好空曠嘅，區外人唔會專登去行街，區內嘅食嘢都大把舊式地鋪揀，就算啟德站開咗都好唔得幾多，因為天橋行過去又悶又遠，嚟緊地鐵站隔籬重話要起商場大廈，唔知係好事定唔好事嘞。




為咗行少啲路，我哋幾個上咗巴士上層。
其實呢，我記得細個嗰陣，巴士上層有一邊係有三座位㗎，我重專登塞喺爹地同媽咪中間，不過後嚟就唔見晒嚕，希望我無記錯啦…當然，如果而家有三座位嘅話，我又未至於會厚面皮到塞入去QQ同細蚊中間嘅，如果係大卡車同細蚊就可以考慮下。
我坐喺佢哋兩個嘅後面。可能想配合返，QQ只係著咗件簡單白T同牛仔熱褲，而細蚊就係一件淺黃T同白色短褲，硬係覺得咁樣出街好小學雞，不過我鍾意，甚至想扯佢哋啲髮尾嚟玩。
蚊：「咦，有Namco喎。」
死場不愧為死場，個推彩虹姐姐喺度玩緊電話，啲夾公仔機一個人都無，有個阿婆帶住個細路仔喺度玩超迷你旋轉木馬，兩個小朋友喺部已經無氣嘅氣墊球機遮住個入口繼續推來推去…當然，我哋都無錢捐畀Namco。