【代糖故系列】《她被寄宿到屋邨男孩的家中》: K108

對我嚟講，得個嘈字。喺廣州漚咗三日，星期五朝早爹地送咗我去搭直通巴就繼續留喺度，話我大個仔自己搞得掂，第時可以一個人嚟探爺嫲…我覺得呢個唔係問題所在嚟…而佢就話返香港麻煩，廣州出發join ship會更方便。
點都好，舟車勞頓咗幾日，我又回到自己那溫暖的家。
不過QQ唔喺屋企，佢講過今日話有嘢做，我就無問詳細喇，可能溫仔，可能同姐妹去燒錢，我無興趣知道呀！不過我唔喺屋企時候，佢晚晚都有同我謦message，算係幾乖咁啦，咁當然唔剩止係我啦，我都驚佢send錯message，雖然我同佢啲內容就比較正常，佢唔介意可以隨便send錯啲情慾message過嚟，等我返到屋企就打爆佢pat pat！
臨走前運咗三枝一點二五lit zero返嚟，話咁快就清晒…
趁而家無嘢做，阿健又唔煩住我落去買先，如果唔係夜晚聽到QQ好似戒毒咁呻吟被迫去便利店買會好揦脷。
結果一買就買咗四枝，喺我蟻躝返屋企嘅途中，竟然俾我見到啲奇景，就係QQ喺條路上面飛奔，十足十佢陸運會跑四百米嘅氣勢，心口陶大宇跑步倒轉地球咁衝緊埋嚟…
我：「妳無嘢嘛？！」我向佢揮手…
Q：「走呀！」佢好似俾人追殺咁，喺我身邊留低咗兩粒字就繼續衝線…但我留意下又唔覺條街有壞人，更加無異型、喪屍同哥斯拉，為乜要跑咁快呢？有同學？就算係都無嘢吖，我同佢兩個已經喺學校成日俾人講，只要唔係身體上過從甚密都重係普通朋友嚟。
咦，喺後方大約三十米嘅距離，有個女…人氣急敗壞咁追緊過嚟；我望一望，停一停，諗一諗，就知道大檸樂。
個女人喺我前面烏低身，雙手撐住自己膝頭哥，氣喘到有兩聲咳好似食完辣椒醬咁；著住白色deep v連身短裙嘅佢心口露出一大條事業線，兼且連個粉紅色Bra都一覽無遺，入面就睇唔到㗎喇，因為裝到滿一滿，我反而懷疑佢呢個姿勢喺後面可以䚎到佢裙底春光…




QQ叫我走，我係咪要走？本身我係三一萬能俠二號，搦住四枝可樂就變咗三號，呀唔係，係大鐵牛至啱；除非我掉走四枝可樂，否則我走條毛，問題係我有走嘅必要？
媽：「個衰女包…點解可以跑得咁快…」
我：「妳…係…Queenie媽咪？」
媽：「係呀，我係Queenie媽咪，乜我同佢唔似樣咩？」
頂你！係似到爆月餅印呀！點解可以咁？我彷彿見到十幾年後QQ長大嘅樣，呢個就係人妻版QQ…我從來嘅喜好都係止於姐姐，對人妻婦人興趣不大；但眼前呢個女…我OK呀，如果QQ消失咗嘅話佢絕對可以替代到，古有小妹妹代父從軍，今有風騷媽咪代女食仔以免佢協助及教唆他人衰十一。