【代糖故系列】《她被寄宿到屋邨男孩的家中》: K111

媽：「阿女呀，媽咪都係為妳好…妳聽話啦。」
我：「為我好？點為我好呀？出咗事之後其實妳有做過啲乜？唔好以為我唔知妳係點生活，我大個女㗎喇，妳唔俾我嚟同妳一齊生活，到底係驚我俾人攪，定係驚有我喺度啲男人會唔show妳呀？」
媽：「妳！…」
我：「打囉，十幾年嚟妳都無打過我，大把父母都有打仔女㗎啦，而家我當補返㗎咋。」
媽：「阿女…我無辦法…先…對唔住…嗚…」
唉，呢個媽咪真係好鬼無用，一無咗男人同錢喺身邊…好彩嘅就係佢個樣重喺度。
我：「唔好喊啦，今日係慶祝我生日…係我曳亂講嘢…妳廿歲嗰陣就生我出嚟喇，而家我已經十五歲唔細，所以…我真係搞得掂OK無問題，所以唔使擔心我。」
媽：「我就係唔想妳學我…男人信唔過㗎，一時失控忍唔住就會…所以媽咪先唔可以俾呢樣嘢有機會發生…」
我：「有無咁易呀，你估下啲衰人有無機會俾我一嘢咬斷？」
媽：「就係咁…我先更加驚…」係嘅，分分鐘攪出人命…




我：「不如掉轉嚟諗，我同男人住，然後叫妳去妳阿哥度住，咁樣好唔好？」
媽：「唔好玩我啦…」佢個樣即刻扁晒嘴。
我：「咁咪係囉，已所不欲，就咪施畀個女啦…」
媽：「咁點同喎，我係大人嚟，可以handle到呢啲嘢，妳而家重係細路女，我唔想妳俾人呃呀…」
我：「咁媽咪妳夠唔夠膽話畀我聽妳十五歲嗰陣做緊啲乜？係咪日日放咗學就乖乖返屋企做功課。」
然後佢靜咗…雖然我呢，其實就對十五歲嘅媽咪興趣不大，但估計應該就唔會乖得過我…掛。
我：「所以我話無問題就真係唔使擔心我，反而妳…」
媽：「咁…我都係做返個女人啫，都OK嘅…」
我：「嗯，所以唔好喊喇，抹返乾啲眼淚，要靚女先得㗎…最好收多啲兵，呃返幾棟樓返嚟，分一個單位畀妳個乖女咪有得住囉。」
媽：「邊有咁易喎，返去未生妳嗰陣都唔得啦。」




我：「媽咪妳已經歎咗好多年㗎喇…所以妳放心啦，我唔會呃男人錢，會好好照顧自己，因為我唔想做碎屍案主角呀。」
媽：「咪亂噏呀，其實…妳會唔會好憎媽咪…」
我：「唔會，因為妳咁靚女，所以我先會咁靚，食嘢先啦，龍蝦湯凍咗就會腥㗎喇。」
你叫我點評價自己媽咪吖…呢個世界，有人溫極書都係考試零蛋，有人勞碌一生都係一窮二白，有人含住金鎖匙出世一生無憂，當然亦有人貪得無厭俾天收，亦有人兩袖清風心中富足。但至少，佢已經用好低嘅成本豐衣足食咗十幾年，重帶挈埋我有得過榮華富貴嘅生活…