【代糖故系列】《她被寄宿到屋邨男孩的家中》: K125

嗱，女神自白呀，識女神係搵笨嘅自殺行為，我嘅人生…
Q：「但點都會重有其他女仔嘅，希望在人間呀。」
健：「開學先算啦，我真係要返屋企，如果唔係阿媽無覺好瞓，行先喇，bye bye Queenie同阿爽。」
輕輕的他走了，剩返我喺度研究乳鴿翼其實有無肉…
我：「做乜咁關心人哋…佢好幫得手咩？」
Q：「唔關事，話晒都好人一個嚟，值得推下嘅。」
我：「睇下妳幾衰吖，人哋一走妳就派好人卡畀人。」
Q：「唔係呢個意思…呢個世界已該夠晒多衰男仔，佢應該幾有潛質，可以等啲女仔留意下佢啫。」
即係點？我係咪就係嗰啲無資格攞衰人卡嘅好男仔嚟？
呀，sorry，係調返轉，無資格攞好人卡嘅衰男仔。




我：「平時又唔見妳關心下隔籬呢個單身寂寞嘅我？」
Q：「EX又鍾意返你，隔籬位女同學又冧你，係你自己唔要咋嘛，關心你嚟把托呀？」
我：「唔係幾好嘅，等十六歲先再諗下點…」
Q：「你話你係咪衰人嚟吖，一講女就剩係識諗咗去呢方面，我先唔得閒理你呀，慢慢打J打飽佢啦！」
QQ搞乜鬼，啲心情真係有夠一時時，但佢又真係好勤力，諗盡辦法搵零用錢，攪到我都唔係幾好意思。
如是者，暑假繼續，QQ都係努力直播，女魔頭YY無搵過我，只係通過QQ個IG望咗一下佢喺紐西蘭影嘅相，傻仔健繼續搵我陪佢玩，亦都有「喺佢屋企」幫QQ手直播，細蚊無纏住我，但其實如果佢搵我我會好開心，只不過唔識面對QQ，呢種心情好矛盾，有啲想問Carmen升學去向，但如果剩係八佢呢樣嘢應該會俾佢鬧，最後就係慶幸Q媽如佢所講無搵過我。
至於我同QQ？無進展㗎，都係咁親蜜囉…
今晚我哋兩個又去咗游水，QQ喺水入面好似隻樹熊咁抱住我，你哋就唔好問有邊啲部位會貼住啦，講得多都譖…其實我有時都會問佢做乜黐到我咁實，只會換嚟一個答案，就係攬住好舒服，等於佢都會問我覺得佢點，我又答返佢係無懈可擊嘅女神，講咗等於無講，情況就一直咁僵持咗喺度；講真同佢嚟游水都係膽博膽，只能夠祈求唔會咁啱有同學嚟，就算嚟亦都拜托因為個游水look而唔認得我哋，不過感覺上安全過跑步嘅，我同健仔跑都已經試過兩次喺條街撞到熟人。
Q：「我諗緊，打算要回饋下啲fans。」
我：「妳講緊邊邊先？」