【代糖故系列】《她被寄宿到屋邨男孩的家中》: K139

Q：「睇你點定義好女仔囉，就算唔打機都唔代表係好女仔，但我覺得會沉迷呢啲嘢，通常都會有啲澩嫪，就好似我一上線就會仆到嚟睇嘅男仔，感覺總有啲一言難盡。」
健：「所以…如果係識我都想留返喺現實世界。」
呢條友，好似重停留喺56k年代咁，而家個個廿四小時對住部高智能電話，其實即係電腦嚟，重邊有分線上線下。
Q：「如果有個壞女仔送上門畀你食，你又打算點？」
健：「欸…如果真係壞，我都唔會鍾意佢啦，可以點。」
Q：「而家係人哋畀你食喎，唔係問你鍾唔鍾意佢。」
健：「但…唔鍾意佢咁咪即係玩佢啫，結果實係大家都唔開心，會唔會出事㗎，妳知我怕麻煩…」
Q：「但煮到埋嚟真係唔食？當個女仔上埋你屋企除晒衫喎，你係咪諗住嗌唔好，然後趕佢走？」
健：「咁我屋企其實成日都有人嘅…做乜要問我呢啲喎，妳明明都係女仔嚟，點解好似慫恿我做衰人咁，我諗我就唔係嗰啲鍾意蝦女仔嘅男仔嚟。」喂，做乜望住我講？
Q：「又未必嘅，如果你係存心要呃個乖乖女，我就一定睇唔起你，呢個世界好多嘢講因果，好多時個女仔…甚至乎係男仔受傷害佢自己都有責任，如果有個女仔送上門你忍唔住食咗，最多都係自私咗啲啫，但大把人係咁啦。」




健：「我唔知…真係有先算，到時或者打電話問妳意見…」黐線嘅咩，係咪當QQ關心一線，定係夫人信箱？
我：「嗱，我就等睇你現實識好女仔，挑戰高難度。」
Q：「吖，講真我覺得Wendy幾好。」
健：「都係…好到唔應該睇上啲壞嘅男仔。」
我：「望住我講做乜呀！我同佢真係無嘢㗎。」
Q：「呢啲嘢心照不宣啦，不如而家開返場嚟打咯。」
就係咁，我哋三個喺七仔出面一路㨃荷蘭水一路打傳說，喺上年呢樣嘢只會發生喺我同健康兄弟呢個組合，點會諗到可以換咗個女神入嚟一齊玩。
Q：「呀！我滴汗滴咗落mon！佢自動開大…」
健：「我隻手濕得滯！推唔郁個方向制…」
我：「冷靜啲…喺街玩本身ping一百，唔好急。」




Q，健：「你匿喺草度梗係咁講㗎！無貢獻！」
呢啲PvP game，邊啱喺街玩㗎…當專業掉分咪算。
玩完就返屋企，女神重係成身大汗，喺（車立）入面都聞到佢嘅香氣，但同一時間我又好驚自己嘅汗味會臭親佢，所以向後褪到去個對角位。
Q：「你做乜嘢呀，古古怪怪咁，做賊嚟呀？」
我：「唔係呀，咁大汗，費事俾妳聞到啫。」
Q：「原來係咁，我重以為你匿埋一角放屁。」