【代糖故系列】《她被寄宿到屋邨男孩的家中》: K142

我：「吓？吓！做乜要去搵Zilvia嘅？」我一頭問號。
Q：「你大驚小怪啲乜，你日日去搵阿健玩就得，我搵Zilvia好正常啫，我無屋企返咋，唔係無朋友㗎。」
平時聽親佢哋都係吃喝玩樂多，無諗過佢會咁樣搵人。
我：「好正常，但…問題係我跟埋嚟有乜用？」
Q：「你擔心啲乜，人哋都無話驚你，自己執生啦。」
我：「吓…吓…」我一頭霧水，然後同佢半路中途落車，呢度係成個九龍最刁鑽嘅地方，就係何文田，明明喺市區嘅正中間偏偏又係一座山嚟，除非特登嚟否則都唔會嚟。
落咗車我哋重要沿一條斜路上山坡，呢度附近都係九龍半山豪宅地段嚟，去到其中一棟樓下面就停低咗。
我：「原來Zilvia…好似犀利過Yvonne呢…」
Q：「吓，你點比較，乜你同佢好熟咩？」死火，口快快講漏口添，呢幾個女仔真係麻煩。
我：「無呀，妳話佢住奧運站嘛，大概知係點嘅…」




Q：「奧運站對面係大角咀添呀，都唔知有乜好比較。」
我：「唓，呢啲嘢…妳哋最興㗎啦，圓方女孩…不過呢度好似有啲舊。」佢喺度send緊message。
Q：「你識條鐵咩，舊屋苑間隔肆正，全部大單位，淨係主人房都三百幾呎，新樓唔會咁起。」
我：「咁妳以前屋企呢？」
Q：「我永遠唔會話畀你聽，咪提我啲傷心事。」
我：「係嘅…但搵我嚟做乜，有嘢用得著我？」
Q：「一陣咪知囉，你覺得Zilvia靚唔靚女？」
我：「唔好玩我啦，貴為我哋級女神又有乜可能唔靚？」
Q：「咁你覺得佢靚啲定係我靚啲？」
我：「嘩，呢啲問題我唔敢答呀，我唔想死住。」




Q：「做乜啫，無嘢喎，話我知啦，我唔會嬲嘅。」
我：「咁我覺得，妳哋各有千秋，平分秋色，睇環境啦。」我都唔知點比好，一個斯文女神，一個百厭女神，重有黐蟹殼女神YY，同埋活躍女強人女神Uranus。
Q：「作死你呀，答咗等於無答嘅。」
我：「係喎，乜妳已經喺日本玩完返嚟嗱，小心攪錯人設喎？」見佢早兩日重喺IG度貼啲舊相出嚟。
Q：「我話幾時返就幾時返啦，邊使同人交待。」
等咗一陣Zilvia就落到嚟，陪住佢嘅重有一隻大得不成比例嘅狗，不過係重量不成比例啫，Zilvia係同我差唔多高，咁我諗我嚟埋嘅作用就係…
Q：「好返啲未呀妳？」Zilvia戴住口罩。
Z：「好少少，妳…竟然同埋朋友嚟。」我係朋友。
Q：「嗯，放假得閒，多過阿四嚟幫手啫。」我係阿四。
我：「Zilvia妳好。」我都唔敢講太多嘢。