【代糖故系列】《她被寄宿到屋邨男孩的家中》: K149

我：「Tim Tam？咁得意嘅，而且重有咁多。」
Q：「好明顯就係澳洲手信嚟啦，雅樂氏出嘅。」
我：「其實香港都有得賣啦，使唔使咁遠水路運返嚟？」
Q：「首先，如果你貪平喺香港士多買，嗰啲會係東南亞版而唔係澳洲版，其次，你望清楚啲先，呢幾包係Tim Tam Deluxe嚟，香港平時得朱古力味同雙重朱古力味，邊有呢度咁多款。」
我：「原來係咁…吉百利媽咪真係十分清楚同朱古力有關嘅零食，記得食多啲，咁就同吉百利更加襯。」
Q：「返去先同你計…不過今次係我第一次見佢送嘢畀男仔，而且睇落重幾開心，可能對妳有好感。」
我：「有乜可能呀…應該純粹係信得過妳啫。」
Q：「我覺得未必，有時聽到我同Yvonne講男朋友佢都木口木面，好似完全無興趣，亦唔會回應。」
我：「我都無興趣啦，你男朋友…除咗有家底，有錢同妳去玩飲飲食食，會送禮物畀妳之外重有乜特別。」
Q：「咁中學生拍拖係咁㗎啦，你重有啲乜嘢無謂嘅期望呀，人哋唔係中東油王個仔，明明你就成日八掛我哋有無攪到…」




我：「咁係關心妳咋嘛…Zilvia咁唔鍾意呢啲嘢，當然無興趣，直頭唔想聽到妳同Yvonne講添呀。」
Q：「的確係嘅…我都希望佢可以放開啲，咁我同Yvonne講嘢就可以放啲，又唔使驚Uranus成日反串我哋。」
我：「都唔明妳哋，兩個老司機，兩個石女，點解會玩埋一齊重可以咁friend。」
Q：「你試下再講老司機，我保證你一塊Tim Tam都唔會有得食，你同阿健咪又係，你識咁多女仔，佢就一窮二白咪又係咁friend。」
我：「咁點同，佢一窮二白唔係自願係被迫，至少佢同我一樣咁鹹濕，望住大波波個衰樣比我有過之而無不及。」
Q：「哼，咁係因為波波已經滿足唔到你咋嘛，唔好以為我唔知，明明我哋四個一樣係高貴優雅美麗得體嘅女仔，會friend都不知幾正常。」
我：「唔知Zilvia係咪咁諗呢？唔理妳，食餅先。」
Q：「開薄荷味先呀，一人一半！」
明明Zilvia就高貴優雅好多，就連彼拉多都係，多謝妳送畀我嘅四包Tim Tam，其實我好鍾意食㗎，妳真係一個好好心地嘅女仔。但點解，我對Zilvia又真係唔會有感覺，就連好似YY嗰少少都唔會有…唔通我真係永遠逃唔出曳曳妹QQ嘅手指罅？
我：「妳咁樣帶我出嚟俾Zilvia見到，唔怕咩？」




Q：「有乜好怕？Zilvia唔係啲會講人是非嘅女仔，同埋我同你係friend呢件事已經成為咗不折不扣嘅事實，暑假約出嚟見下面，搵你幫下手都係人之常情，如果你驚俾人話你做兵都可以同我保持距離嘅，我有男朋友都未驚俾人話我玩仔啦。」唓，係都話瘟神先啦。