【代糖故系列】《她被寄宿到屋邨男孩的家中》: K151

我：「我明點做㗎喇，唔好諗得我太低B先得。」
Q：「咁你重同我大安旨意坐喺度，重唔快啲換衫？」
我：「妳叫我準時七點半到喎，而家五點都未夠。」
Q：「PK仔！你要幫我手抬個keyboard去呀。」又係喎，不過買咗琴袋其實都唔係好重啫。
我：「但…陶小姐，妳自己都未換衫好意思話我？」
Q：「重話你唔係低B！我有乜可能著住嗰套衫通街走，梗係預早去到慢慢set㗎啦，我就嚟俾你激死！」
唉，我都有返工搵錢畀妳開飯吖，而家搞到我好似做咗妳個無糧出嘅員工咁，而個傻仔健又係…
不過鬼叫妳成個商界女魔頭咁，睇在我真心鍾意妳，同埋員工福利唔差嘅份上，deal就deal啦！
開工嘅QQ，好敬業樂業，想當然亦都對我特別冷漠，喺地鐵入面佢繼續溫佢啲琴譜，準備一陣嘅run down，記住邊個位係邊個坐咁…
Q：「好喇，dismiss，陣間記得準時。」喺大廈大堂…




我：「重有成粒幾鐘，我可以做啲乜好？」
Q：「自己諗啦，喺街溝下女都得㗎。」真係識講笑。
我：「女神加油呀。」然後佢就入咗（車立）。
曾經QQ都陪我返過一日工，今日就輪到我陪返佢。
喺旺角街頭有乜嘢做？對一個男仔嚟講，無嘢買嘅話其實係無乜嘢可以做，又唔去得遠，去現時點有得睇無得買重辛苦，最後都係留返喺西洋菜南街嘅百記睇下啲貴死人嘅電競notebook。呀，咁啱見到M記App有一蚊大可樂，即刻仆過去先。
※※※※※
沙：「御主…呀！我好掛住妳呀，Kuromi妹妹！」
我：「真係？我哋都只係一齊返過一日工啫。」
沙：「嗯，雖然係，但係妳靚女得嚟又可愛，一直都好希望可以再同妳一齊返工㗎，嚟吖，入嚟先。」
以前我會覺得喺MK蒲得嘅都只會係hi bye friend，估唔到隔咗幾個月沙織姐姐對我重係咁熱情。




入到去都係咁嘅樣，一如既往，熟悉得嚟又有啲陌生。
「咦…呢個女仔好靚呀。」「唔通係新嚟嘅女僕？」「佢攞住咁大嚿嘢唔知係乜嚟呢？」
宅男其實幾千年嚟大概都係咁嘅樣，無論世界點變，佢哋都係同桃花一樣在，見到靚女就不停望，而且我重見到一個我唔係咁想咁早見到嘅人仔。
沙：「妳入去搵女僕長先啦，我重要招呼埋呢幾個客。」
我推門入咗廚房，呢度仍然係另一個世界嚟。
我：「女僕長妳好，好耐無見，今次真係麻煩晒妳。」