【代糖故系列】《她被寄宿到屋邨男孩的家中》: K164

何：「妳的確係一個好叻嘅女仔，頭先喺入面聽到妳嘅performance都feel到，我已經再請唔起妳做嘢…」
Q：「哎吔，唔好咁講啦，大家都係返工，為咗搵錢咋，我夠唔識煮嘢食啦，咁樣一比妳都好叻。」
何：「係喎，沙織妳可以行先㗎喇喎，一早已經過晒鐘，妳平時都唔會咁夜放，今日真係辛苦晒妳。」
沙：「吓，唔會呀，我當咗佢哋係朋友，邊捨得咁早走，同埋，我覺得今晚係我返咗咁耐工最輕鬆嘅一次，又有音樂聽，又唔使諗同啲客講乜。」
我：「嗯，食晒喇！放心，唔會阻妳哋收工！」
何：「咁多都食得晒，估唔到…果然係青春期嘅男仔…」
我：「我重以為剩返咁多炒意粉妳實會留嚟聽日用。」
何：「唔得啦，雖然意粉唔會溶，但雪完返煮會粉㗎。」
我：「我都估唔到，因為嚟女僕餐廳食嘢嘅人應該唔會對食物有乜要求，無理由對佢哋咁好。」
何：「其實好唔好味？認真答我。」




我：「呢個…妳問佢哋都得啦，成日有機會食。」
沙：「嗯，梗係好味啦！我次次都食肉醬意粉嘅。」
何：「你明知…問佢哋係唔會問到真話嘅。」
我：「嗯…咁如果要同平民肉醬意粉嘅頂端大家樂比又真係差啲嘅，話晒佢哋落足幾種芝士嚟焗，不過都要睇彩數同手勢，有時會硬得滯，我諗妳呢度未必有焗爐…」
何：「有，但細爐只可以一次焗兩個，搞唔掂。」
我：「所以呢，同大快活比就啱，我覺得不相上下啦，論肉醬佢哋係好味啲嘅，但呢度意粉有兜底，似返大排檔風味，我覺得唔錯，價錢就，無得公平較量，如果唔係我覺得以前OK便利店嘅芝士叮肉醬意又係另一個頂點，係有口感比較差嘅問題啫，不過而家加咗價又偷工減料，塞咗好多粟米落去，就嚟連波仔都不如。」
何：「你都…真係幾專業㗎喎。」
Q：「呢個平民食家嚟，食嚟食去都嗰幾樣…」
我：「嘻嘻，不過真係唔錯㗎喇，我見妳啲咖喱有加自己煮嘅薯仔同蘿蔔，已經超出咗我嘅預期。」
何：「梗係啦，我對自己嘅出品有要求㗎！因為我本身真係鍾意煮嘢食，亦唔想剩係靠sell性感女僕…不過唔怕同你講，我以前真係有諗過好唔好用OK或者波仔意粉嚟serve客。」




我：「你絕對可以咁做㗎，啲靚仔應該食唔出，對妳嚟講又方便好多，點解唔咁做嘅？」
何：「因為…個兜要潷返落碟執到似自己煮都煩，同埋…自己煮嘅話點計成本都平十蚊八蚊嘅。」
我：「但其實…妳平時一碟賣七八十蚊，應該唔重要？」
何：「哈哈…你咁講都錯唔晒嘅，不過自己煮到咪煮囉，係嘞Queenie，我要計返今日啲錢畀妳。」
女僕長就攞咗銀包出嚟，執咗啲五百同一百蚊紙。
Q：「哎吔，真係唔使咁多喇…」望一望係千七。