【代糖故系列】《她被寄宿到屋邨男孩的家中》: K166

同女僕長講完再見，我哋一行三人就落返西洋菜南街行去旺角地鐵站方向，作為保鑣嘅我當然要行先死先咁留意下街頭有無異樣。
沙：「好開心呀，終於可以有張同妳影嘅相，之前唯一嗰張落咗喺死肥仔手上，真係諗起就嬲。」
Q：「放心啦，嗰張合照早就唔存在喺呢個世界上。」
沙：「點會呀，佢重攞咗嗰幅相嚟做電話wallpaper，有時我會唔小心見到，試過同佢講唔想自己個樣出現喺佢部電話上面，佢就話當睇唔到就得，因為我係唔重要，佢心中只有Kuromi女僕，如果我介意嘅話可以幫我打格仔，我叫佢直頭crop咗我嗰邊，佢就話唔得，因為會影響張相嘅正常比例，最後不了了知。」
Q：「頂…呢隻肥嘢…真係想死…」
沙：「雖然唔知道妳同佢嗰日之後發生咗乜嘢事，點解佢會做咗妳個fans，但係從嗰日起佢每次上嚟都無帶畀我哋麻煩，只係安靜咁食嘢，都唔錯嘅，Kuromi妳真犀利…」
據我所知，QQ剩係喺呢間女僕餐廳返過兩日工，之後就無聽過佢提起其他女僕，大概都唔會有聯絡；不過呢，女仔之間就好似行緊一個intranet咁，只要一見到面就可以不停咁謦欬，which is我哋男仔係駁唔到入去嘅。原來沙織姐姐同Carmen一樣都係今年考DSE，但成績就…算係配合返佢MK妹嘅身份啦，聽聞佢會讀毅進，或者下年自修補考返三四科希望可以多啲合格咁話，而QQ就都係同佢講加油努力呢啲例牌嘢。
有時我唔知QQ係真心定扮嘢，畢竟佢都算係半個高材生，我哋喺佢眼中算得上係乜呀，不過睇住佢幫細蚊個樣又覺得佢好真誠。
沙：「Kuromi，交叉仔，有機會就嚟探我啦！」
如果單純見沙織姐姐我OK，但係如果係女僕式綑綁銷售…




Q：「太好，無驚無險又一工！」上咗地鐵佢挨埋嚟。
我：「恭喜晒…其實我都好羨慕妳。」
Q：「你真係搞笑，以前我高高在上嗰陣你唔羨慕，而家嚟羨慕我啲乜喎…」佢向我嘟嘴抗議。
我：「以前妳高高在上，又唔關妳事，而家得返妳自己一個，都重係高高在上，所以先羨慕咋嘛，頭先坐我隔籬嗰位朋友仔，話佢課咗成二千蚊先得榜廿幾。」
Q：「你…唔係喺度咁小家計我搵到幾多錢呀？係呢排暑假得閒播，佢哋又出手闊綽啲先比較多咋嘛。」
我：「嗯，妳總有方法搵到妳嘅生活嘅。」
Q：「你唔好話…我生日收男朋友個銀包就四千幾，冧下瘟神收隻錶又六千，直播講多兩句就有新keyboard。」