【代糖故系列】《她被寄宿到屋邨男孩的家中》: K196

「我而家放過你，嗰邊班中一睇到我重使喺度撈嘅？」
我見佢扮晒蟹雙手交疊抱胸，雙腳微張…
我：「Sorry sir！」我九十度鞠躬，維持咗五秒以上。
「返上去啦，唔好再遲喇。」
真係無鬼聊，你想要威啫，我實幫下你嘅。
「重有！你個頭成個雀巢咁，同我搞搞佢呀。」
今日開學本來全世界都係要喺操場集隊嘅，但係由於天雨關係除咗中一嘅傻仔之外其他人就可以返課室先；嗯，呢班中一，真係鴨仔嚟，個個個樣都傻頭傻腦咁企晒喺雨天操場，想當年我中一嗰陣呀…咪又係第一日返學就遲到！
希望佢哋今日玩得開心，中一開學特別多嘢搞，玩到放學都唔知自己今日做咗啲乜大有人在。
正當我踏入課室，叉咗半隻腳入門口，我發覺有啲唔對路；我預計中都會有好多唔識嘅新同學，但無理由成個頭排一個都唔識㗎，奇奇怪怪咁嘅？
「爽哥，你過嚟做乜呀？」係瘟神嘅其中一個小迷妹。




仆街！即係話呢度係中三嘅課室，而我…去咗上年班房。
「你唔係冧班呀？」
我：「無啲咁嘅事，我只係嚟視察下。」我扮到好鎮定。
「低B，分明係走咗嚟上年班房。」「哈哈哈哈哈…」
我：「無錯，嚟懷緬下，埋埋齋先去新課室開學。」
我懶理佢哋恥笑嘅聲音，文人上身咁凝望咗一下上年我同QQ坐過嘅位，再喺佢哋嘅歡笑聲之下被歡送離開。
問題係，我個新課室喺邊？無記錯嘅話中四係高一層…
但係我都唔知邊班打邊班，逐間課室入去望實會被恥笑，重要係同級添；所以我扮到肆無忌憚目中無人咁慢慢行，經過門口嗰陣就瞟入去睇下啲熟人喺唔喺度。
非常好彩地，第一間課室我就見到肥豬坐咗喺近門口嘅位置，隔籬重係細龜，呢啲社嘅友誼果然犀利。
入到去，我發覺到唔對路，不過係另一種唔對路。




豬：「你都好嘢㗎喇，第一日返學就遲到。」
我：「無，無呀，啱啱好趕得切入嚟。」
其實我只係想搵個空位坐落去…但頭四排全部都係人，四大美人當然喺度，而健仔佢…身邊竟然有條女喺隔籬！你條友唔幫我霸位不特止，重要背叛我同女坐，枉我平時對你咁好你竟然恩將仇報。
豬：「你條友企喺度做乜呀？係咪你嚟教書？」
我：「我只係搵緊位坐…」再望多次都係無位。