【代糖故系列】《她被寄宿到屋邨男孩的家中》: K218

Y：「一，電話app都只可以停到你住嗰層同G樓，二，你玩多幾嘢就會收到管理處電話，三，人哋要suspend你個account都只係㩒幾下制，唔該你呢啲咁鍾意玩（車立）嘅仆街仔死返去你自己棟樓慢慢玩。」
我：「你話只可以去自己嗰層，但大廈點都有走火通道呀，如果唔係點走火警？咁咪去到第二層囉。」
Y：「理論上係，但咁麻煩就唔會有人做無聊嘢，而且走火梯係有閉路電視，你去遊蕩嘅話可能有人嚟搵你，甚至乎頂層專戶係會有警鐘防煙門分隔。」
我：「搞咁多嘢成本一定好鬼貴。」
Y：「你咁八掛咪讀完書考個保安牌嚟做，到時有得你慢慢研究，你牛高馬大應該唔難俾人請嘅。」
我：「唔制，我要高級啲…做通渠佬嚟幫女主人通下…」
Y：「收皮啦你，我想講呢啲嘢其實好鬼煩，有時部八達通機一壞就成堆人塞晒喺度…」
講完一輪廢話我哋已經上到去佢嗰層，佢嘅門口無裝到鐵閘，只有一道深實木色嘅木門，把手位上面有一大條長方形嘅黑色嘢，YY打開個蓋㩒指模就聽到咔嚓一聲，再拉動手把就成功開到木門…
我：「我想問，隻手濕或者損咗…係咪就返唔到屋企？」
Y：「多用途㗎，㩒密碼都可以。」佢開始反白眼。




我：「呢嚿嘢係咪要插電㗎？」
Y：「唔使，用電芯嘅…你唔好問，我答埋你，樓下信箱有放電芯，或者可以問管理處借，同埋有個位可以插奶媽USB畀電，你滿意未？」
我：「咁如果電芯盒同USB頭俾人整壞呢？」
Y：「大佬！你用普通鎖芯咪又係有機會俾人塞鐵線，AA膠，香口膠，有乜分別呀？！」
我：「我無野問喇，法官大人。」
幾經辛苦…我終於將兩大袋書放咗喺佢門口玄關嘅走廊位，而我隻腳仍然係踏足喺門口嘅出面。
我：「屋企無人？」
Y：「應該無啦，阿哥喺U開學實大把嘢搞…」例如女…
我：「嗯，我諗…我都係唔入嚟喇。」
Y：「乜你覺得我個樣似係會俾你入嚟咩？」




我：「唔緊要，我只係想表達我無諗住要打攪妳。」
Y：「傻嘅咩，你入嚟嘅話，我會好驚囉。」
我：「我對你呢句說話保持懷疑嘅態度，對住主人…我從來都係誠惶誠恐嘅一個嚟，不過我想問下，係咪就咁㩒（車立）就可以離開呢度㗎喇？」
Y：「梗係啦，唔通要困住個客人喺度咩…」
我：「咁Yvonne，聽日見喇，bye bye。」
點知我擰轉頭行咗一步隻女魔頭就嗌停咗我。
我：「乜事呀？認真…我無諗住上門提供性服務。」