【代糖故系列】《她被寄宿到屋邨男孩的家中》: K224

我：「吓，即係佢而家諗住再接再厲屢敗屢戰？」
Q：「唉，唔想知呀，最衰你同我咁熟，如果唔係叫你走去八下佢想點都好。」
我：「但明知自己衰過一次，有必要再嚟過咩？」
Q：「佢嗰陣…係嗰啲試探式嘅表白嚟，唔算太認真，所以你都唔可以話我直接say no，只係叫佢咪講笑。」
我：「唔認真嘅男仔就更加唔應該理佢㗎啦。」
Q：「咁男仔係咁㗎啦，要知道如果佢越係重視一樣嘢，越係驚輸，就越係唔敢盡地一鋪，佢當時應該係想試下我會有乜反應，或者希望我本身冧佢會主動撲埋去掛。」
我：「佢當妳係一般妹妹仔咩，會唔會大想頭咗啲？」
Q：「你可以咁諗，如果試探性進攻有一成機會贏，九成機會輸但無乜後果，相比起全力以赴有兩三成機會贏，但輸咗就一無所有，佢呢啲咁要面嘅男仔應該都會揀前者。」QQ真係好清楚男仔心入面諗緊乜。
我：「妳當時係單身？心入面其實諗緊乜？」
Q：「我咪諗住…睇下佢進一步會點囉，但無嘢發生。」




我：「即係話如果佢認真嘅話其實可能有機會？咁妳就唔再係而家呢個男朋友而係會變成佢？」
Q：「我唔知道…其實兩個男仔係差唔多時間識嘅。」
我：「嘩，如果佢知道嘅話一定會好後悔點解唔一開始就認真追你，而你男朋友亦都好好彩一開始就同妳豪賭。」
睇佢哋嘅愛情故事就好似賭場上面嘅博弈爭奪咁，而我呢啲屋邨仔就只係市井之徒強搶民女，雖然都有得食…
Q：「唔同嘅，我男朋友無得揀，嗰陣同佢一齊上嘅只係intro course，完埋最後一堂基本上就唔會再見面，我只係同佢有少少曖昧，佢選擇咗喺最後嘅時間約我重直接同我表白，或者佢覺得就算唔得，個結果都只係少咗一個IG friend咋掛。」
我：「然後妳就答應同佢一齊？」
Q：「梗係唔係啦！我同佢只係上咗四堂個半鐘嘅堂咋…同埋你唔記得我先啱啱經歷完個仆街EX咋咩，所以我當時好小心，對男仔好顧忌，咪同佢講話想認識多啲先，咁之後嗰啲管接管送，食飯禮物，教做功課，彈結他畀我聽你都明㗎啦，而咁啱佢又係情人節前同我表白，追咗我三個月先答應佢一齊咋，之後到咗暑假成日見…我生日又過得好開心，所以咪…就係咁嘞。」
我：「做靚女真係好，我下世可唔可以試一次…」
Q：「我唔否認呢啲體驗同待遇係因為我靚女，但靚女都有煩惱㗎，邊似得你咁無憂無慮…」