【代糖故系列】《她被寄宿到屋邨男孩的家中》: K226

讀咗咁多年書，排隊呢啲望兩眼就已經識自動波埋位，先生都只係做下樣咁幫我哋輕微褪位。
慕：「早晨阿爽。」佢打招呼之餘不忘同我比對高度。
我：「早晨…男班長…呵喊…嗯…放心啦，你實喺我後面。」我對於高度呢啲無感覺，只係唔想排最後，點諗都唔會有著數嘅；Myth隔籬係一個更加高嘅木獨男，而我身邊嘅都高過我啲，一個唔識嘅男仔；阿健同肥豬就並列喺我前兩三排，是但啦，喺男女唔會溝亂排嘅情況之下無論點變應該都唔會有太大影響。
慕：「喂，你真係攞咗我嗰四朵玫瑰㗎？」
我：「無話攞唔攞，只係keep起咗，如果你想要返我可以一陣畀你，斷估你唔會再送多次，攞嚟冧其他女囉。」
慕：「唔需要喇，由得佢啦，但你都唔好送畀人…」
我：「我對上一次送摺紙畀女同學，係隻跳跳青蛙然後同佢一齊玩，花呢啲唔啱我…係呀，我唔係想阻你搵食㗎，不過你都見佢哋琴日唔受個樣㗎啦，我先攪下gag。」
慕：「一如傳聞你都真係幾串嘴㗎喎。」
我：「多謝讚賞，其實我真人都幾自閉下，如果你唔鍾意我可以唔使同我講嘢嘅。」
慕：「咁又唔使，你係咪溝緊Queenie㗎？」




我：「嘩，唔好咁抬舉我…我自慚形穢，何德何能呢？不過我想講佢哋四個出晒名麻煩，如果你想溝佢哋嘅話可能會荊棘滿途，小弟祝你好運。」
慕：「無囉，只係互相認識下，溝通下咁啫。」
我：「係囉，唔先溝通又點溝女喎。」
慕：「你條友…殊！早會喇！」妖，又係你條友撩我謦欬先，扮乜嘢啫？我咁厚面皮就唔怕早會嗰陣俾人點名批鬥嘅，不過你身為男班長，俾全校人笑就唔係幾好啦。
一輪倒模式嘅講話之後，又係柴娃娃全校學生經兩條樓梯返上課室嘅時間，埋位之後除咗兀凳已經唔知有乜好做…
慕：「各位同學起立！」「鄧…老…師…早晨…」
雖然兩位班長水溝油咁，但好似都溝通過由邊個嗌。
鄧：「早晨…呀…喂，科長你兀凳兀得咁開心，好得閒？」攪乜鬼呀…呢個女人係咪M到得閒得滯？
我：「Miss Tang早晨！而家OK！請問有乜嘢吩咐？」我亦都好配合咁彈起身一副烚熟狗頭樣望住佢。
鄧：「你唔知道今日係要收暑期功課嘅咩？有無做呀？」




我：「有做！而且今年係無技術性漏空！咁我見妳都要上嚟咯，咪等埋妳先囉，又可能有人無做要等妳鬧下㗎嘛…」因為未係咁熟，課室只有零落嘅笑聲。
鄧：「全班最有嫌疑嗰個咪係你嚟囉，你如果早啲幫我收晒啲交課先我咪可以早啲教書囉。」
我：「但係，而家明明係非常寶貴嘅班主任節時間嚟。」
鄧：「我知呀，但要搞嘅嘢琴日都已經搞晒啦。」