【代糖故系列】《她被寄宿到屋邨男孩的家中》: K228

鄧：「唓，你估下你哋偷偷地喺櫃桶send message嗰陣我係咪一定睇唔到？同埋如果你哋有緊要電話，唔通又罰你哋咩，呢個年代…」
豬：「咁啱啱個電話一定係非常重要。」
鄧：「幾啦，校長打嚟嘅。」
U：「唔通…Miss Tang妳又無得教我哋班？」
鄧：「係就好，我都想。」佢真係夠晒坦白…
慕：「咁，究竟有乜緊要事會勞煩校長大人喺妳教緊書嘅時候都要打電話嚟？」
鄧：「等多三十秒大家就應該知㗎喇…」
唔通係…走火警？太平紳士嚟參觀？教統局督學嚟監堂？唔會係差人叔叔上門拉我衰十一掛？！我要供埋隻QQ出嚟！講笑，我邊敢對女神不敬…
呢個Miss喺度故弄玄虛唔出聲都唔知攪乜，過咗陣佢行近門口望咗望，然後個樣呆咗。過咗一秒佢掐咗兩下手就有一個女仔行入嚟課室，今次實行全班呆晒。
係女神！係仙女！假到好似AI畫出嚟咁！




鄧：「各位同學，教咗幾年書我都係頭一次遇到呢個咁老套嘅環節，由今日開始我哋班會多一位插班…」
Q：「Vienna？！」QQ無視課室規矩企咗起身大嗌。
V：「Queenie！妳真係喺度！」然後佢行咗埋嚟QQ身邊，兩隻手搭住咗QQ膊頭，而QQ就放返兩隻手上去疊住佢手背，好一副義結金蘭咁嘅款。
一切都發生得太突然，全班同學連埋個傻豬先生剎那間都變得目瞪口呆，望住兩位真靚女喺度互相深情對望，而佢哋大嗌完對方個名之後都無再出聲…原來女神除咗可以沉船落雁蔽月收花之外，重可以將時空封印。
鄧：「有熟人係好事…不如…都介紹下自己先？」
V：「啊！Sorry Miss！」佢行返出教師枱側邊。
呢位叫Vienna嘅女仔，著住一襲純白色嘅刺繡短袖旗袍，啲刺繡位反射出一絲絲嘅閃亮銀光，長身旗袍啱啱冚過膝頭五吋左右，而喺側邊就開返個七吋叉，領口位大概封住半頸，而喺頸位對落心口對上就有一個大約高四吋嘅菱形小開空，絕對係性感得嚟唔會帶有一丁點嘅暴露。另外佢對裸足都襯返一對配合件衫嘅銀白色繡花半尖頭平底鞋…
V：「老師，咁多位同學，大家好！由今日開始我會加入你哋呢個大家庭，小妹名幽蘭，大家可以嗌我Vienna。」佢稍稍彎腰對住我哋欠身行禮，令我諗起咗YY個公主friend，但呢個就更加大方得體舉止優雅。
鄧：「就…只係得咁多？」Miss嘅氣場完全被蓋過。
V：「好抱歉，我都係第一次做插班生，唔知應該講啲乜好…」佢帶住小小羞澀嘅微笑令全場男仔都醉咗。




鄧：「妳個名係出自洛神賦？」曾經聽QQ講過…
V：「係呀，微幽蘭之芳藹兮…失敬晒。」