【代糖故系列】《她被寄宿到屋邨男孩的家中》: K237

我：「欸…關於呢個問題，妳唔係要擔心又做我哋兩個班主任多啲咩？」
鄧：「有啲嘢，你唔講，佢唔講，係唔會有人知㗎！就連我都唔知啦。」
我：「妳都幾天真㗎喎，明明鴕鳥政策呢個四字詞係妳教嘅，重有掩耳盜鈴。」
鄧：「嗱，我而家杯弓蛇影勸你就唔好煩住我，總之我位就調硬㗎嘞。」攪乜鬼…我都無佢咁上心。
我：「妳都知我情況…其實我同邊個坐好閒㗎咋，例如健仔都得。」然後佢就唔理我耍手叫我走。
V：「放低功課都入去咁耐嘅？」
我：「哦，咁有功績就要嘥少少時間俾佢讚下㗎啦…然後呢度就係校務處，除非遲到或者唔見學生證，否則都無乜機會入去㗎喇，而唔關我哋事嘅校長室同會議室都喺埋入面…」
V：「我知呀，今朝先嚟報到完。」睇幽蘭嗰款都知係非富則貴，要校長親自接待確實唔出奇嘅，話晒入學。
我：「然後呢間係升學就業資訊室兼醫療室…呢間係輔導室同埋駐校社工房…跟住呢間係後備課室兼自修室…然後就係男更女更同體育用品室，對面就係已經同我哋再無關係嘅金工室，重有server房編輯房…」
介紹完地下層之後見時間都差唔多就返去課室先。




嘩，仆街，都未打鐘阿sir做乜咁早到嘅，於是我哋兩個就雞咁腳跑返埋位，但…點解QQYY唔見咗嘅？重要換埋人添！唔通衰人Miss偷偷地調位？但出面個阿sir就皺晒眉頭咁。
「已經齊人喇喎，做乜大相公嘅？」我完全唔知乜事，於是咪望一望阿健，點知佢指一指門口我唔明點解。
「哈哈哈哈哈…哈哈…」
「你有無去錯課室呀，呢度係M2喎！」
我：「呢個問題…我想問讀統計係M1定M2呀…」
「哈哈哈…M1呀！」「過主啦！」「阿爽咪攪事啦…」
我：「咁…請問讀M1嘅話我要去邊呀？」
「低B！你見我哋過晒嚟就知交換課室啦！」
又係喎…我完全無預計過會咁樣拍返埋隔籬班上堂，就好似細胞交換分裂完又合拼返咁…於是我就埋首摷返本M1書出嚟過隔籬。
「咁呢位…女同學，妳又係唔係讀M2㗎？」




V：「阿sir早晨，我係插班生所以應該未有我名。」
「但咁樣呀…我都唔會知妳係讀M1定M2㗎喎…」
V：「我讀M2吖。」佢好肯定咁回答老師。
U：「嚟吖，坐我隔籬一齊上堂吖。」
嗯，對我嚟講始終都係跟住QQ比較重要。