【代糖故系列】《她被寄宿到屋邨男孩的家中》: K241

管：「如果妳真係好唔方便，都可以攞返屋企先嘅…」
U：「不如趁熱食啦，難得管家攞到過嚟畀妳。」
Z：「係囉，我哋聽日先一齊食啦，一樣啫。」
V：「嗯，唔該晒…但以後唔使再買外賣嚟畀我。」
管：「係嘅，小姐請慢用，咁我到放學再過嚟接妳去試校服啦，我而家要去攞車先，街錶得半粒鐘，再見。」
講完管家就急急腳走人，呢袋外賣都算係超高成本咯。
我：「咁不如我留喺學校陪佢食，妳哋自己搞掂啦。」
※※※※※
肥叉飯，公仔麪，食乜好呢…其實自己一個人食乜都唔會有分別，唔知便利店咁早會唔會做特價呢…
我：「咦，妳哋唔係成班出去食嘅咩？做乜又返返嚟？重攞住袋外賣添…」而且個樣好似唔多高興。




Q：「總之有意外啦，你一唔一齊喺學校食呀？」
我：「兩位大小姐，妳哋係問緊我？」
Q：「唔問你問邊個呀，睇你個款今日無人理你㗎啦。」
V：「對唔住呀…攪到Queenie妳要留喺學校陪我食。」
Q：「傻啦，我哋朋友嚟㗎嘛，點會唔陪妳呢。」
V：「但佢哋都係妳嘅朋友嚟，要妳同佢哋分開…」
Q：「有乜所謂，我同佢哋成日都見㗎啦。」
我：「咁…我同妳哋一齊食㗎喇。」
雨天操場個食飯區有兩種枱，一種係main area嘅大長方型枱，主要畀啲嘈到拆天嘅男仔喺度開飯，重會一路食一路玩，一路抄功課，又或者啲乜班聚學會聚，總之就好亂，唔social嘅又或者女神級嘅都好少會喺度出現；另一種就喺花園側邊嘅圓枱，靜好多可以喺度謦欬，有時會有啲老師個別約同學嚟食飯，或者有啲意味不明嘅男女喺度開餐…我係指上面把口開餐啫，唔關下面事。
好明顯地我哋三個當然要行去圓枱嗰邊坐低。




Q：「咁我哋兩個去小食部買嘢食先，妳食住等啦…」
其實我都好耐未試過lunch喺度排隊…因為論性價比佢隨時輸比燒臘鋪或者便利店，係中一嗰陣先鍾意喺度食魚蛋送杯麪罷就，後來就會發覺返屋企自己煮爽太多，而且阿婆都會煮飯畀我食。
我：「妳哋攪乜鬼，鬧架反面呀？」如果左女神一個朝早可以令佢哋四個分裂就簡直精彩過宮心計。
Q：「鬧你個頭，我唔會允許呢件事發生，係佢個管家送飯嚟畀佢食，所以咪得返我陪佢囉。」
我：「嘩，工人都唔夠…重要管家添。」
Q：「管家連司機囉，你理得人哋吖，記住講嘢小心啲唔好失禮人，佢唔似得我咁隨便㗎。」
我：「我都明嘅，妳呢個賣豬的小女孩。」
Q：「喂，學校lunch其實有乜食㗎？」
我：「嘩，原來妳讀咗三年書一次都未食過㗎？」
Q：「未喎，最hea咪出去M記大家樂食，點會喺呢度同人迫，又俾人望住晒。」