【代糖故系列】《她被寄宿到屋邨男孩的家中》: K250

於是我就將枝有氣礦泉水倒晒落杯果汁度，估唔到放咗咁耐枝水都重係幾凍下，睇嚟個管家係好小心咁將佢雪到介乎結冰嘅狀態先交畀個大小姐。
我：「好好飲呀！」係感動到打尿震嘅味道呀！
Q：「哦，你死喇，你用人哋枝飲管飲人口水尾，你成世都要聽佢話都似。」我承認我唔係專登只係慣咗…
V：「咁係咪佢飲過妳口水尾所以先咁聽妳話？」
Q：「唉，成日對住佢，有啲嘢好難避免嘅。」
我：「唔得閒同妳哋小學雞，真係好好飲，好味過七喜好多，好味過青檸，好味過大家樂嘅龍鳳檸樂。」
Q：「有無咁誇張呀，整啖嚟試下…真係好好飲喎！」
V：「啊，妳又飲返佢口水尾，到妳要聽返佢話嘞。」
Q：「唔係咁㗎，我飲完佢口水尾佢會更加聽我話。」
V：「錯呀，係你兩個都飲咗我口水尾，所以係你哋要聽我話，嘻嘻…其實我屋企定期都會喺沖繩運啲柑汁返嚟，我得閒就攞枝返嚟畀你哋吖，咁就可以自己喺屋企沖。」




咁開朗又活潑嘅女仔真係有抑鬱症？總覺得有少少難以置信，定係純粹想反抗屋企同引人注意呢？
食完飯，首先有兩堂連堂英文…
「喂，阿爽！你唔好以為坐喺最後我就睇唔到你趴晒喺枱面瞓覺噃！」唔好問我點解英文Miss講粵語，因為我唔識打咁多英文字，你哋有需要就按照自己喜好自行喺個腦入面翻譯做英文或者繼續接受呢個奇怪嘅設定啦。
我：「Sorry Miss…一時…飯氣攻心…」
Y：「嘩！好鶻突呀！阿爽你條口水絲重吊住喺枱面上面，so dirty！」呢個女人絕對係唔送我落地獄唔安樂。
「嗱，你咁大個人唔好話Miss喺度管你有無專心上堂呢個問題，而係你高中第一日上堂就咁嘅表現，我會foresee到你到咗DSE放榜嗰日一定喊到七彩，到時就真係肯定成張枱會濕晒，所以我係有責任叫你起身嘅，除非你而家同我講你已經打算放棄DSE，咁我就由得你。」
我：「Sorry Miss，暫時未有呢個打算。」
「咁你係咪即係想同我講將會有呀？」
「哈哈哈哈哈…哈哈…」
我：「希望唔會啦，應該唔會嘅。」




「咁不如你快快脆脆去洗手間洗個面再返嚟上堂？」
Q：「抹返乾淨張枱呀！影衰晒…」佢掉咗張紙巾上我枱面，唉，要做女神嘅跟班實在唔係易事…
V：「Miss，我咁啱都想去洗手間，請問可唔可以？」幽蘭佢舉手發問，呢個問題…相信大家都知全班嘅反應…
「可以嘅…咁我都休息兩分鐘。」Miss都呆咗。
我：「Vienna，男女校有條不成文規矩，就係一般上堂情況男仔同女仔唔會一齊舉手去廁所㗎…」