【代糖故系列】《她被寄宿到屋邨男孩的家中》: K265

J：「但係Miss喺出面…雖然佢話由得我哋自己調位，但攞電話出嚟睇會唔會唔係幾好？」
Y：「咁又係，佢個款都唔係善男信女嚟，咁就不如…今日放學我唔得閒，星期一lunch嗰陣妳再畀我睇啦。」
J：「可…以，好呀。」雖然重係好驚奇，但睇得出佢係釋懷嘅，女仔之間嘅芥蒂通常係根深蒂固，今次YY真係賣咗個大人情畀我，雖然我知呢啲操作對佢嚟講係簡單…
大概六七分鐘就調好晒位，但Miss無理我哋，然後又望一望個鐘，我哋全世界都唔敢出聲等夠鐘。
X：「你哋stable啦嘛？唔會爆炸吖嘛？如果你哋OK嘅話，而家呢個pattern係可以抄埋去Chem Lab嗰邊嘅，又或者你哋想攞嚟煩嘅話可以再排過，我就建議一式一樣好啲，真係攪唔掂先再調囉，我亦唔知Chem先生會唔會幫你哋安排…好，咁既然夠鐘，我哋而家quiz啦。」
「吓！乜嘢話？唔係掛？都未教書！」嘩聲頓時四起。
X：「冷靜啲，無得溫㗎，你哋當係見工嗰啲aptitude test就得，有啲係你哋以前學過嘅嘢嚟，當俾個機會我認識下你哋嘛，唔會計落成績表度嘅，但我希望你哋認真對待，如果hea答嘅話會極之影響我對你嘅印象，我已經準備好五個versions嘅卷，所以你哋係可以望隔籬笑下嘅，但就唔好影響其他人嘅答案唔該。」
What the？五個版本嘅卷…佢係咪飲飽水無尿屙？！留返嚟潮式吹奏嗰陣先一次過激噴？唉，佢老公實好開心。
當我攞到份卷…我諗全世界同我一樣O晒嘴。
請問以下那一位是理科生該認識的偉大女性，A南丁格爾，B凱倫凱勒，C居禮夫人，D德蘭修女…我剩係知南丁格爾係護士，即係同Bio有關？就A啦…




在月球上有一棟四十層樓高的大廈，一名蟑螂先生準備好氧氣罩和降落傘後從天台跳下，請詳解後事。
係後事定身後事先？先生係咪重點？小姐就識飛？飛蟻？
一艘太空船上只有大量液壓氫氣作為能源，並且配有點火器，請問它能夠在宇宙航行嗎？如能，靠甚麼原理？
如果把一粒沙子加速到無限接近光速，再打落你身體上腸道的位置上，你覺得你還能夠生存嗎？請形容。
請問你如何評分同組的異性組員？以十分為滿分，填寫答案後請沿虛線把頁尾摺起以保障個人安全。
三年對住呢個大美女，應該都幾好玩。
交完呢個所謂嘅quiz之後就繼續上lab堂，Miss攞咗啲車仔，砝碼，斜坡，汽球出嚟教力學，無打開過本書，一條數都無計過，大家都玩得幾開心。