【代糖故系列】《她被寄宿到屋邨男孩的家中》: K268

做得promotion當然要教下啲新豬點打橋牌，在所難免要派張規則畀佢哋教下書，包括德式同合約，跟手佢同主席搵咗幾個新人試玩德式，非常簡單大家好快就明白。
幽蘭就一路咁寫佢嗰張計分紙…
「跟住要教contract，齋噏嘅話好難會聽得明，不如一路搵人示範下好唔好，識玩又記得嘅就出嚟幫下手。」
V：「阿sir，我可以呀！」然後佢就捉埋我出去demo。
我諗佢都估唔到會係個新人自動請纓，然後我哋就加埋主席同興仔一齊玩，開晒牌等大家都睇到，再簡介下同對家係一team，嗌牌有乜策略，乜嘢係夢家，點樣為止成約，至於分就其實無乜人識計，都係諗住贏過七磴就算…
「咁不如你哋試下模擬一場真嘅等大家睇下。」
派完牌，我即刻攞返張貓紙出嚟計分睇下點嗌。
席：「喂，死仔你出貓呀，諗咁耐嘅！」
我：「乜喎，係我隊友同我賽前就預定好嘅策略，我梗係要跟返，總之我唔係話佢聽我有乜牌咪得。」
計完分，跟返佢個編配邏輯我就嗌two spade，我都未試過第一口就加兩磴嘅，通常都係一磴或直接pass，興仔pass，點知幽蘭補多磴變three spade…




席：「要贏九磴喎，咁就等妳示範下啦。」
由於佢嗌贏咗我就開晒牌做夢家，非常好。而唔使一陣佢就贏足十磴，比起合約重多咗一磴，大家都有啲驚奇呢個新人嘅能力，而且重攪到主席有啲無面。
再玩咗幾局，幽蘭繼續主動出擊，我就做夢家嘅居多，攻嘅時候多數成約，係有一局個波畀返我結果差一磴，而當啲牌唔好嘅時候，佢竟然嗌NT嚟迫個主席就範結果我哋又守到。明明係簡介日，點知大家都睇得好緊張。
「興仔，不如試下換我落嚟應戰。」
講真無乜人喺度會好認真玩，平時阿sir都係炒我哋居多；雖然只係玩下啲牌全部隨機無話交換牌換隊打，但就算係咁，無論啲牌時好時壞，幽蘭一樣打到阿sir無得輕鬆食住我哋，只可以平分秋色，主席就更加唔敢出聲。
「呢位同學，請問妳打咗幾多年bridge？」
V：「由二年班玩到而家喇。」
「你會入會㗎可？請妳一定要入會！有妳喺度我哋學校隨時可以報學界比賽。」
席：「乜橋牌有學界嘅咩？」
「勉強叫有嘅…有幾個有heart嘅先生form咗個中學橋牌聯會，雖然係小眾啲，都有十幾間學校參加。」




V：「咁平時放學嚟玩下又無乜問題嘅。」
「係呢，可唔可以比張計分紙我睇下你哋嘅策略？」
我當然乖乖交出，佢就睇得頭頭是道好似非常滿意。