【代糖故系列】《她被寄宿到屋邨男孩的家中》: K274

我：「唔會㗎…而且大個咗就越嚟越大力，一下盲拳有機會打傷人，呢間學校又無乜人撩是鬥非，所以我都好耐無同人打過架嚕…又或者，可以上集水區試圖搬啲大石整塞佢，咁樣都會幾舒暢。」
V：「你唔止影響自己喎，重係唯恐世界不亂…同埋呀，我又邊會有機會做呢啲嘢，大部份時間我都係喺屋企俾人看到實，乜都唔做得，就連鎅手我都唔敢。」
我：「傻嘅咩，好痛㗎，我上次鎅到手臂痛到我…妳咁靚女千祈唔好鎅呀，花咗就唔完美…」
V：「靚女又有乜用，所以我諗過…鎅大髀或者屁股呢啲人哋唔會睇到嘅位置。」
我：「希望妳唔好嬲，我只會叫妳唔好咁做…或者…妳可以瘋狂咁使下錢買嘢，食好多妳鍾意食嘅嘢…」
V：「你認為咁做我就會開心咩？同埋我唔要肥呀，如果肥咗我會更加抑鬱…我好驚…Queenie以後唔會再想同我呢個有錢女玩，會嫌我麻煩。」
我：「應該唔會嘅，佢有好努力搵錢，佢喺班姐妹面前都重係扮到同以前一模一樣，食好嘅著好嘅，唔使擔心。」
V：「我就係擔心佢覺得辛苦…明明我可以幫佢…如果要佢繼續同我一齊玩我驚佢會好重經濟負擔，但假如我就晒佢同佢一齊慳嘅話佢又會覺得我委屈自己，又或者我幫佢出晒佢又覺得唔好意思…到時佢唔想同我一齊咁點算…」
我：「同妳一齊玩要使好多錢？」
V：「又未必嘅，我覺得佢以前重大使過我，只不過我啲消費，好多時都唔使我自己出咁。」




我：「放心啦，Queenie好硬淨，識自己諗辦法。」
V：「當我知道佢唔再係有錢女，我好唔開心，我唔想見到佢受苦，但當我見到佢同你玩得咁埋，個樣同以前無乜點變，就覺得舒服返好多…但係我好驚…佢嘅生活…佢嘅世界，變到同以前唔同晒，就會唔想再見到我。」
我：「對佢有啲信心啦，就算唔信自己我都會信佢。」
V：「佢真係適應到而家嘅生活？佢有無喊呀？」
我：「初初佢被迫要去親戚度住…嗰陣時嘅佢真係好慘咁喺我面前喊，但自從佢嚟咗我屋企之後就無再喊過，我諗…最緊要係佢喺我度可以無憂無慮，無人會管佢，可以做自己想做嘅嘢…重要過生活有幾富貴掛。」
V：「我一直好羨慕佢，成日都自由自在，喺學校又咁多朋友，有得識男仔又可以拍拖，永遠要乜有乜咁。」
我：「不過佢拍拖好似都係偷偷哋呃住屋企人㗎咋，或者妳學下佢囉，而家嚟咗男女校實大把機會啦。」
V：「話就話佢阿媽會睇住佢，但佢媽咪都傻更更嘅，連佢啲活動幾點完都會唔記得無嚟接佢，跟住就可以偷偷走去玩…呢啲邊輪到我喎，我管家同工人長期喺身邊，屋企人又成日check我喺邊做緊乜，放咗學想周圍去玩都唔得，重點會有男仔想識我喎。」