【代糖故系列】《她被寄宿到屋邨男孩的家中》: K289

我：「前八婆就有佢份，妳話Uranus係前前女神都合理啲吖唔該。」對唔住YY，其實妳已經對我好好，雖然行為上係不停咁糟騭我，但我知道妳係無惡意，妳係我永遠嘅叢林女神嚟，可惜我唔係孟獲。
Q：「衰得你吖，我叫佢八婆就得…人哋係對你態度差啲唔等於佢係衰女仔嚟㗎。」
我：「係乜都好啦，始終有啲嘢係高下立見無得避。」
Q：「重無得比添，幽蘭真係太好人，我都唔好意思。」
我：「相信妳嘅好朋友啦，我諗佢真心為妳好，想妳開心嘅，唔好顧慮太多。」唔係靠佢我真係無辦法支援QQ呢啲消費，大拿拿千五蚊夠我哋做好多嘢㗎喇，QQ就算搵到啲錢平時都要同佢哋虛耗，有剩我諗佢都唔捨得…
Q：「我當然知，只係希望將來可以有機會報答返佢。」
然後我就準備晚餐，QQ見有少少時間就順便溫下書。
我：「睇嚟真係好開心，平時都唔多見妳係咁玩頭髮。」
Q：「哎吔，唔好意思，俾你發現咗添…」
我：「做乜唔好意思，嘅然靚女咗就要好好欣賞下啦。」




Q：「唔得㗎…女仔成日玩頭髮同照鏡會好嘥時間，其他人見到又會覺得個女仔剩係識發姣得個樣。」
我：「有無咁嚴重呀，美化市容係女仔天生嘅使命嚟㗎喎…」所以我真心唔明你條仔係點扚起心肝起身返學…
Q：「會㗎，一陣玩玩下Uranus又會笑我係個賣弄女色嘅無用女人，喺佢眼中女仔投資落自己外表上面成日姿姿整整就代表咗自願依賴同please啲男人。」
我：「其實妳哋幾個咁樣同天王星相處攰唔攰？」
Q：「又唔會話攰嘅，佢又唔係直接批評我哋，只係講得太過直白啫，但都係事實嚟吖，呢個亦都係我哋幾個同班上面其他女仔嘅最大分別，Yvonne一早睇通睇透對住佢就唔會駁嘴，不過有時會同我講笑咁講話覺得佢呢啲遲早俾男仔呃，至於Zilvia…就當然唔會有任何反應。」
我：「唓，佢自己就明明都係靚女嚟，男仔鍾意靚女，女仔鍾意靚仔呢啲天性嚟㗎，係咪佢以後搵男朋友要專登搵個唔靚仔嘅，甚至乎要矛盾到搵個唔鍾意靚女嘅男仔？」
Q：「呢啲就唔知佢喇，真係到佢有一日想溝仔或者會考慮受溝先算啦，到時都唔知乜世界，我哋平時又唔會share自己啲感情生活嘅，唔通得我同Yvonne喺度講咩，正好等我哋兩個唔使計較咁多。」
據我呢幾日觀察同一直以嚟嘅認識，呢四個女神確實有好大分別，可以相安無事喺埋一齊咁耐都算係奇蹟，唔似得其他堆咁讀書嘅就死讀書，姣閪嘅就狂擘髀。