【代糖故系列】《她被寄宿到屋邨男孩的家中》: K294

Miss係咪short上腦定黐咗邊條孖筋？佢想送我去天堂定係地獄？明明自己話怕事但又搞埋啲咁激烈嘅嘢。
Q：「Hi，好耐無見。」佢坐咗喺我右手邊。
我：「唔好玩啦，明明妳頭先先喺我左前。」
V：「又會咁啱嘅，同返你坐。」
明顯地呢個唔係啱唔啱嘅問題，擺到明係班主任佢有心玩嘢，今次真係左右女神逢源攪到我郁不得其正！
除咗呢樣嘢，佢嘅擺位大致上係參照返我哋嘅自然排列同上年同班嘅組合，佢基本上亦都無拆散到五位女神。
我嘅位置係尾二排正中心位俾兩個女神之首夾住，我前面係YY，左前係阿健，右前係細龜，阿健左邊隔走廊近牆就係思韻同肥豪，而Zilvia同Uranus就分別喺我左後同右後；佢哋中間係邊個？好嘢咯，係男班長。
我：「恭喜晒喎，Myth公子。」我唔係幾敢一坐低就同兩個女神太friend，所以都係搵啲同性抒緩下先。
慕：「受之有愧，呢樣嘢我邊夠你嚟吖…」如果以橋牌計分為例，攞住Queenie同幽蘭就係A同K，而Zilvia同天王星就係Q同J，咁YY係咪十仔一隻？
Sorry，容許我更正一下，我左右兩邊係紅黑Joker至啱…




「嘩，Miss妳咁樣擺位法，公平咩？」
鄧：「坐位呢啲嘢邊有得絕對公平㗎，有乜問題先？」
「中間後排，好益佢哋啫…」
鄧：「哦，啲班長科長有擔當吖嘛，咪對佢哋委以重任囉，呢個位放你落去你又夠唔夠膽坐落去先？」
啲花生友即時無聲出，俾兩個校花級女神夾住所受嘅壓力其實係非一般…明明我就無話過要做乜長物長，都係屈揼砌嘅，至於班會主席當然唔出聲，我諗佢都受唔起呢啲大禮，有得同個企理嘅女仔坐算係贏咗。
鄧：「如果各位無問題嘅話我開始教書㗎喇。」
U：「Miss，我有個不情之請…」
鄧：「女班長，請問所為何事呢？」
U：「請問…我可唔可以同男班長佢掉位呢？」
鄧：「其實將你哋放埋一齊，都係因為你哋嘅身高，同埋方便兩位班長溝通做嘢啫…」




U：「同佢坐唔係問題，但我可唔可以對掉坐中間。」
嚟到呢一刻，我哋幾個當然知道佢目的係保護Zilvia。
鄧：「但係妳怕唔怕科長佢會遮住妳前面睇黑板？」
U：「佢未有呢個能力啦，加埋條友成日伏喺枱面嘅…」
死人天王星，明明無得罪妳都要過我一棟。
鄧：「咁如果你哋都無問題，我批准你哋換位啦。」
如是者，我哋就喺呢個充滿新意嘅環境之中上堂。QQ一早就同我講過幽蘭嘅學業能力絕對喺佢之上，所以夾喺中間嘅我就變得更加垃圾，望住佢兩個寫嘅中文筆記就好似睇緊佢哋鬥書法咁，幽蘭啲字比較有風骨，而QQ啲字就比較雅致，睇到我自慚形穢唔敢寫字。
Q：「喂，講緊段落大意喎，你一隻字都唔抄呀？」
我：「個個都抄一樣嘅嘢，遲啲問妳借返嚟睇囉…」
Q：「放心，你咁鬼懶我一定唔會借畀你。」