【代糖故系列】《她被寄宿到屋邨男孩的家中》: K296

理論上我可以求QQ幫我度稿，但如果寫得太好就會令其他人懷疑，而且又唔可以俾細龜睇到QQ啲手稿，咁可能要勞煩右女神佢打字跟住又會勒索我啲唔知乜…
V：「咁不如你同我一組，妳兩個就帶住細龜？」左女神嘅提議真係夠晒跳脫，對我嚟講實唔會蝕嘅。
Q：「我實無所謂嘅，妳呢？」
Y：「咁我唔通say no咩，你兩個唔使擔心喇。」
龜：「多謝幾位女神。」雖然佢講到明對呢啲現實嘅港女無興趣，但對住佢哋都係保持恭恭敬敬嘅態度。
分組就咁完成咗，其實我覺得同任何一位女神做呢啲功課都無問題，就算係Zilvia，只要我乖乖哋應該都可以好順利完成，除咗天王星會比較麻煩啲之外。
鄧：「喂，科長咁你而家收埋啲預習簿攞落嚟畀我啦。」
頂佢吖，臨打放飯鐘先嚟講啲咁嘅嘢，結果個個同學掉低本簿喺枱面就趕住出去食飯，受傷害嘅總係我。
健：「咁，不如我去大家樂幫你霸定位？」算你今次有返啲人性，重記得我係你嘅好同學。
我：「幫我嗌埋焗肉醬意zero，記住用我QR儲印花！」




健：「放心啦，我實會用埋你啲五蚊券。」
我：「用Q晒喇，無著數益你。」
而啲女神們亦都要謦下點食飯…
Q：「我同Vienna有商務午餐，今日唔同妳哋食喇。」
U：「我都約咗先生謦嘢，咁我行先喇。」
Y：「思韻無約人？不如同我同Zilvia一齊食？」
YY今次算係最無托手踭，講得出做得到解決咗個問題。
而我收晒啲簿之後就落去交功課，再慢慢走人出去食飯，點知俾我喺校門前面見到個人。
我：「阿康自己一個？一唔一齊食呀？阿健佢喺大家樂霸咗位。」
康：「呀…唔喇，已經有人等緊我食飯，下次先。」




我：「哦，咁下次先囉，你喺而家嗰班幾好吖嘛？」
康：「OK呀，再講啦，而家唔得閒…」然後佢就急急腳向前行；攪乜鬼？明明得你自己一個人，就算唔一齊食都可以一齊行出去嘅啫，做乜好似要避開我咁嘅？
雖然呢幾日無理過你，都唔可以話係我問題㗎…正當我放慢腳步望住佢嘅背影思考嘅同時，我身邊又出現咗…
我：「咦，Wendy，乜咁啱呀？」又係一個人。
W：「呀，係呀…下堂M1見啦。」九唔搭八又走咗。