【代糖故系列】《她被寄宿到屋邨男孩的家中》: K301

我：「哦，咁妳哋會係文書姐姐同財政姐姐？」
Q：「就算係都係妹妹啦！喂，你條友仔攪乜鬼？」
我：「過咗隧道啦嘛，已經係大圍嚟。」
Q：「傻瓜。」然後佢又挨咗落我個身度。
唉，好想，我好想，點解我唔係中產，我唔使要自己好有錢，勉強中產都夠㗎喇，我一定會宣戰整散妳同埋妳條仔，就唔信我會差過佢…可惜而家嘅我，想體面啲咁同妳出嚟拍拖都做唔到，又點敢令妳身邊少咗條水魚。
要知足…我已經好幸福，有得拖手重得到咗好多嘅嘢。
我：「我都知妳要嚟大商場，但其實準確目標係乜？」
Q：「謝瑞麟。」
我：「我無聽錯呀？即係周生生同周大福嘅朋友？」
Q：「大驚小怪啲乜呀，行啦！又唔係要你去Van Cleef & Arpels。」係囉，你哋都唔知佢講緊乜喱，我點會知？




我：「哎，大小姐，使唔使去㩒錢先呀？」
Q：「唔使呀，我已經準備咗喇。」
難怪佢啱啱會悉心打扮，孭埋Loewe袋又戴Apple錶，就算入去混吉都無咁樣衰吖嘛，不過只要帶住我已經破咗一半功；話雖我知道金鋪係一樣乜東東嚟，亦都睇過下出面啲櫥窗，但咁大個仔真係第一次入嚟。
Q：「嘻，見到啲閃爧爧就會好開心㗎喇！」
「兩位好呀…小姐係嚟睇金飾嘅？」QQ喺度左望右望，其實我都唔知佢想睇乜，或者想成間鋪吞落肚。
至於QQ點扮就都係小妹妹嚟㗎喇，邊呃到人，所以個sales姐姐有啲唔知點應付佢好。
Q：「唔啦，呢排金價好貴，而家買唔抵。」
「或者重有得升嘅，買嚟保值都係一個選擇嚟。」
Q：「如果要保值就唔買飾金買金條啦，嘻嘻。」呢個港女到底有邊忽似中四小妹妹？一開口就知佢絕非池中物，好想知佢以前重係有錢女嗰陣行街會係乜嘴面，就連幽蘭呢個百億千金都話佢大使…
「其實我哋而家都推出咗啲年輕時尚系列，主要用18K金，玫瑰金，或者925銀嚟做材料，價錢相對上嚟講會比較實惠，可以過嚟呢邊睇下。」




我知925銀係乜，就係潘朵拉欺騙少女的秘密。
所謂嘅年輕系列，主要係一啲混色拼接戒指，玫瑰金耳環等等，重有啲可能溝咗黑鋼，有啲水晶粒粒呢啲平嘢咁，至於QQ睇下睇下又移咗去睇銀戒指。
我：「Zilvia要嫁人嗱…做乜睇純銀戒指？」
Q：「呢啲唔係銀嚟㗎，係鉑金嚟。」
我：「薄金？即係乜？」
Q：「鉑金即係platinum，我都唔知點答你好…」
我：「但係個牌仔上面係印住白金㗎喎。」講堅我唔係玩嘢，我當然聽過人哋講白金，亦唔係同帛金撈亂。