【代糖故系列】《她被寄宿到屋邨男孩的家中》: K319

我：「我鍾意呀，全部好好味…大小姐，乜呢度無cam影住喇咩？」我會咁問係因為佢又坐到貼一貼。
好似又唔係問題嚟，我同佢嘅肌膚之親已經嚴重過QQ…
V：「無呀，呢度無值錢嘢俾人偷，除非有人對啲水，個水箱同泵，冷氣櫃，太陽能板呢啲有興趣啦…理論上要喺出面爬上嚟唔太難，但係由於有鋼門同室內分隔所以唔會入到屋，同埋爬入嚟嗰下本身已經會alert到防盜，而且影住泳池感覺可能有啲怪掛。」
我：「如果我係賊，我會半夜爬入嚟偷偷游水。」以前試過爬入閂咗嘅運動場，泳池感覺保安高好多唔敢試。
V：「勸你唔好諗，個池成年幾無用過，一池死水嚟。」
我：「都係水啫，咁會點㗎？」
V：「好難講，無水流動會有好多昆蟲屍體，可能有嘢喺度產卵，可能有雀仔嚟屙屎，空氣中嘅灰塵都會沉澱。」
我：「我重以為泳池只係一個載住水嘅石槽。」
V：「梗係唔係啦，全部泳池都好高成本㗎，又要去水又要濾水，泵房隨時重嘥電過冷氣，呢度無濾水如果要換就要用好多水，你估出面啲泳池成本只係請幾個救生員咁少咩？」
我：「係嘅…咁點解會成年都無用過嘅？」




V：「我成個暑假都唔喺香港，邊有人用吖。」
我：「真係好大嘥，其實而家嘅天氣都重有排熱…」
V：「唔用確實係嘥咗個池，但如果只係游兩三次，就變成嘥水嘥電嘥時間嘥人力物力，本身每次換水就要去水曬乾然後掃垃圾洗池底再放返啲水，一個人嚟絕對係由朝搞到晚先換完，其實合乎邏輯唔用就唔應該放水，但爹地覺得乾池唔好風水喎，所以咪攤咗喺度。」
我：「呀，我醒返起啲校園動畫成班同學一齊洗泳池嘅熱血場面喇。」
V：「知就好，所以唔好諗住口輕輕話去豪宅做管家，要做起上嚟嘅時候慘過做苦工，我一句話想游水管家先生就差唔多無咗一整日，你覺得我好唔好意思講吖？如果你好想游我可以同管家先生話你自薦嚟洗池叫佢放水㗎。」
我：「欸，辛苦都唔緊要，但係我邊識喎。」
V：「你只要落手做一次，就會覺得康文署啲泳池平到好似天堂咁，而且重係標準池嚟。」
我：「但係以妳嘅身份應該唔會去公眾泳池？」
V：「又未至於完全未去過嘅，以前中小學嘅swimming gala都係喺公眾泳池搞，如果我平時想為咗個標準池嘅話可以叫管家同我去，但屋企人會驚我俾飛仔撩，所以管家一定會入埋去睇住我，加上公眾泳池啲水質唔多掂，超多氯氣，一樣有昆蟲屍體無人撈，阿伯會吐痰擤鼻涕，重有啲可愛嘅小朋友…你明㗎啦！」
我：「咁我勸妳唔好去，我曾經做過嗰個可愛嘅小朋友…而且大個咗之後…試過…喺入面射精添。」