【代糖故系列】《她被寄宿到屋邨男孩的家中》: K328

V：「你講得啱，除咗公眾泳池之外起標準池係完全唔乎合經濟效益，尤其係喺香港呢笪地方，就算我唔介意買五星級酒店啲健身會籍或者日卡，都無一間可以畀到個標準池我，而據我所知私人屋苑嘅話係得第一城有標準池，但嗰度感覺好似同公眾泳池無乜分別，其他嘅有啲夠五十米長甚至長過，不過係不規則形，有啲唔夠深，有啲唔夠闊，我覺得維景灣畔嗰度算唔錯。」
我：「又係嘅，就算再有錢喺香港都買唔到一個水清沙幼嘅完美私人沙灘。」
V：「飛走咪得囉，我暑假喺北海道日日都有得游，完全唔使同人迫，香港游過最舒服嘅標準池係科大入面嗰個，但要約個喺入面做研究嘅uncle帶我去。」
我：「我諗…我都係留返喺公眾池昅女就算。」
V：「你呀，根本就想個池越迫越好，可以係咁追住人哋個pat pat嚟游，我有無講錯吖？」
我：「無嘅，但同一時間我唔想要周圍啲師奶同阿叔，最好可以有完美水質添。」
V：「嗱，你努力啲搵錢，大個咗就開間私人泳池，入會限十五歲到廿五歲嘅靚女，入場必須要著比堅尼，如果裸泳嘅話重可以免費添，可能有得做呢！」
我：「嘩！女神好犀利呀！點解妳咁清楚我諗乜嘅？」
V：「Queenie一早同我講咗你個腦裝垃圾，有幾難估喎，所以千祈唔好嚟污染我個泳池，呢度無女畀你昅。」
我：「有妳一個昅都夠晒啦。」




V：「哼，我先唔會同你喺度游水呀！」講佢就係咁講，但就一路擰乜塊面喺度暗笑。
我：「不過如果喺度開pool party嘅話應該會幾開心。」
V：「嗯…有機會嘅，等同佢哋熟啲先啦。」
我：「而家都唔叫熟咩？再等就要出年㗎喇。」
V：「出年咪出年囉，我識咗佢哋一個禮拜多啲咋。」
我：「咁其實…妳都係識咗我一個禮拜多啲。」
V：「點同，Queenie話得可以喺你面前放心講嘢，即係代表咗你係唔同嘅，佢唔係咁易幫人背書㗎咋。」
我：「乜嘢係貝書？背書我就識…」
V：「背書即係佢為你作出擔保咁囉，唔知佢而家做緊乜呢？」其實我都好掛住QQ，左女神係取代唔到右嘅。
嗯，唔通呢個就係成語不出其右嘅意思？




我：「佢今日放學好似無約應該自己一個返咗屋企，斷估蒸咗包公仔蝦餃嚟做下午茶，為咗獨食難肥唔使分兩粒畀我而喺度陰陰嘴笑。」
V：「Queenie真係好可愛，而且重好幸福。」
我：「妳都可以好幸福㗎，要食乜靚嘢都有。」
V：「咁唔同嘅，可以同佢一齊食就幸福，同埋公仔點心其實都幾好味。」每次一講起QQ佢就心花怒放咁。
我：「妳咁鍾意佢，好彩妳唔係仔嚟啫。」
V：「係嘅話…你無行㗎喇，佢男朋友都無，就算我同屋企反面都要收留佢喺度，然後再搶走佢，呵呵。」