【代糖故系列】《她被寄宿到屋邨男孩的家中》: K337

然而佢一走，成班計緊數嘅師兄就當我殺父仇人咁（目屈）住我，不過呢堆係friendly過其他男同學嘅，畢竟都叫一場相識。佢哋係咁審問我點樣先可以舞到左右女神佮佮掂，我都唔知點解釋好咪唯有答佢哋係隔籬位嘅加乘，我俾佢哋兩個夾住坐呢件事一早就傳到全校皆知，佢哋就繼而問我用咗幾多錢嚟收購班主任得出呢個座位表，抑或其實係本身同班主任有路…
到咗第二日，星期四，day 6…飯後係三堂電腦堂，喺電腦室上所以理論上都係Lab嚟，而由於揀CIT嘅人比較雜亂，文理商都有，所以大家基本上都係跟返班嚟分堆坐。身邊幾個女神都係商務港女嚟基本上揀晒Econ，除咗天王星…QQ話過佢由於乜都試過落手做所以唔太信重理論嘅經濟科對生意有乜幫助，未來嘅營商環境大勢所趨一定係E-commerce，所以無得兩科都報嘅情況下佢就揀咗CIT。Anyways，揀電腦科嘅重有我好朋友傻仔健，宅男細龜，我唔多想見到嘅易同學，雖然佢都應該唔想見到我…而佢有兩個friend喺Bio班同商科班，所以就自成一角坐埋一堆。
呢度簡介一下男班長Myth哥係一直有夾開band嘅，佢隊嘢叫做Mythology中文譯做神話，由佢哋幾個隊員嘅名嚟砌成，實在係認真自大…除咗佢之外隊員有Oliver，Louis同埋Gregory，你無聽錯，就係嗰隻貴價背囊牌子個名…啲唔鍾意佢嘅同學會暗坎叫佢做geography；而呢啲名一聽都知道係玩世不恭公子哥兒嘅名，但唔關我事嘅，佢哋有佢哋玩，我連佢哋邊個吹啲打邊個拉二胡都唔㞗知。
學校係無夾band學會嘅，都係啲同學自己組隊玩，想玩只要book音樂室隔籬相連嘅band房連錄音室就得；前提係啲隊員成績要OK，亦唔可以攪三攪四做埋啲影響校譽嘅嘢，當然呢啲嘢係得個講字，佢哋有無攪三攪四就真係得天知地知，不過我自己呢啲身有屎就梗係閒事莫理。
教電腦個阿叔就成個中年宅男咁講嘢都幾悶下，佢話唔想嚇親我哋就唔教寫程式嗰啲先，而係教我哋比較熟識嘅word，唔好睇少呢啲日日用嘅嘢，當你要set邊界，整左右頁雙面印重要編埋頁碼其實係好鬼煩，用落係會打從心底屌㞗標基點解個介面咁弱智同唔人性化。
而我哋第一堂嘅任務就係釘裝個folder畀自己，跟足格式打封面頁，目錄頁，同埋印notes加練習穿落去，簡而言之就係做啲好無謂但又好煩膠嘅嘢…
個阿sir犀利呀，教完第一堂求祈示範完啲功能就自己走咗去break，叫我哋自己做住先成半粒鐘無返過嚟…