【代糖故系列】《她被寄宿到屋邨男孩的家中》: K352

我：「係嘅，佢哋啲屋企個個都有頭有面，有邊個先生保到我吖，除非幽蘭同學要保我啦。」
鄧：「你…究竟同佢哋玩乜呀，點解會咁㗎？」
我：「點知喎，又係妳安排到佢哋成堆圍住我。」
鄧：「我只係想你可以跟住佢哋一齊畀心機讀書，而家我都好後悔咁樣同你調位。」
我：「唔使太驚嘅，成班女仔都好叻，Queenie會睇實我，相信佢哋自己解決問題會好過妳喺度亂擔心。」
鄧：「咁我落返去喇，希望你同佢哋唔好鬧架，亦唔好太過相親相愛，係咁先…」乜意思喎…
我：「放心啦！全部都係普通同學嚟！」
好眼瞓，邊有精力溫書，唯有趴喺枱面一路點名，雅如同Zilvia好早就返到，等咗陣就到Vienna，QQ同YY係比較遲嘅…細龜都返到，佢個樣好似唔太開心，雖然我從來就唔太識分佢幾時開心幾時唔開心，而男班長見到我喺度剔剔剔就喺度冷笑；唓，有乜好笑，平時女班長咪又係唔畀面你，畀著第二個可能送上門任你玩添喇。
數下數下爭阿健一個，預備鐘都打埋，唔知條友攪乜。
我：『死仔返唔返學㗎？唔知醒？定係病咗？』唔通條友真係同女打機打到喪咗，好難講，Kuromi就話十點瞓啫…




U：「親愛嘅爽同學，請問齊唔齊人呢？」佢都當完值。
我：「爭健仔一個，佢無覆我message，其他齊嘞。」
U：「OK，無人要你去搵佢喎，畀返我就得。」
QQ無乜表情咁望咗我一眼，訊息係盡在不言中。
然後如常嘅班主任節，過咗五分鐘到健仔終於敲門入嚟。
鄧：「估唔到喎，今年第一個遲到竟然係由你開齋。」
健：「好對唔住，我以後會多加留意，盡量避免呢種情況再次發生。」佢好企理咁向先生四十五度鞠躬道歉。
鄧：「欸…校務處登記咗就得啦，咁大個仔自律喇。」
然後佢就飲咗豬肉湯咁行返埋位…通常一個人個樣望落越正經兼且平平無奇，越代表佢個靈魂唔知飛咗去邊度，攰到得返個殼咁走嚟走去，而我就索性懶得扮嘢趴喺度。
精神唔夠上堂表現當然打折，左耳入右耳出，不過有左右女神喺我隔籬就隨時問都得，所以我完全唔擔心。




U：「爽同學，今朝班主任節已經公佈咗今年社費維持喺五十蚊，我啱啱同Kevin謦過，班會費一樣收五十就可以齊頭一百唔使煩，所以…」一到小息呢，佢就…
我：「嗱，一百呀，呢啲我唔會欠妳嘅。」
U：「我唔係叫你交畀我，係叫你幫手收晒全班。」