【代糖故系列】《她被寄宿到屋邨男孩的家中》: K354

我：「原來…係好事嚟，睇嚟可以慢慢享受下。」
我同QQ算唔算係曖昧緊？我諗連佢咁叻女都唔識答；以前嘅自己的確會好想得到個女仔嘅所有，越快越好連大腦都唔使經嗰隻，但而家就會enjoy同佢哋糊裡糊塗咁相處，就算同YY惡攪都係一樂也。
健：「祝佢哋好運啦，你嘅身份比較尷尬都係唔好打攪人比較好…係呢，你…又唔問下我嘅…」
我擺到明係專登唔問佢嘅，因為唔想佢問左問右煩住晒，而且亦都唔想影響佢，加埋我同QQ呢邊七國咁亂。
我：「做乜遲到嘅？練波好攰？唔通虧咗？」
健：「虧你個頭…嘻嘻嘻…哈哈呵…嘻嘻嘰嘰嘻…」男人老狗笑到咁恐怖只有一個可能性，就係發春…
我：「你…係咪唔夠瞓喺度傻笑…咪噴飯落我度呀。」
健：「我開心…嘰嘰…吖嘛，乜你…嘻嘻…唔開心咩？」
諗起天王星重點開心得落？無端端做咗佢隻狗咁…你話好似YY咁主要同我玩同利用我侮辱我都無所謂吖，呢條女堅砌㗎，乜都要我做分分鐘命都短幾年，重衰過同佢炒大鑊。
我：「無乜特別開心，你唔使將你嘅神經病傳染畀我。」




健：「做乜唔問我點解開心嘅…哈哈呵嘻嘻…」我真係擔心佢再咁笑落去會樂極生悲，一嘢哽親一命嗚呼。
我就梗係知佢有嘢想晒命啦，回想傻仔當年喺度性幻想Kuromi咪又係喺度淫笑，只不過而家更加恐怖…嗰陣時我啱啱同細蚊一齊，明明考緊試我同健康兩個溫下書，就一路心不在焉咁騷擾佢哋，話乜女仔波大波細其實只係攞嚟過手癮，到真係合體嗰陣平平哋細細粒攬埋一嚿其實別有一番風味…暑假嗰陣我重喺阿健面前攬實細蚊嚟嘴，又攝隻手去佢條褲入面摙pat，同背心衫袖揸波…叫傻仔健快啲落力溝返條女，因為真係好好玩…
我知我以前好滋擾，實在對唔住你兩兄弟…亦好對唔住我嘅EX們，我根本無尊重過妳哋，剩係識大波細波咁掛喺嘴邊…其實身體嘅size無關痛癢，而係心入面嘅對方。
我：「咁…唔通你中咗六合彩頭奬？係咪呀？點解啫？」
健：「嘻嘻…唔係呀，呢排有姐姐同我打機。」
我：「哦，我知呀，欣姐吖嘛，無乜特別啫。」
健：「你…嘻嘻…真係咁諗…認真喎？」
我：「認真，點解唔認真？咁唔通我晚晚對住女神又要笑到缺氧喇喎？同女仔打機係開心嘅，欣姐睇落都幾好人又玩得，慢慢enjoy下，但千祈唔好好似對Kuromi咁盲目迷戀，就算你見到佢戙喺你面前都唔一定知佢諗緊乜㗎，唔好再傻傻下咁係咁送skin，大姐姐未必受呢套。」