【代糖故系列】《她被寄宿到屋邨男孩的家中》: K363

U：「你理得我啫，跟住我行就得啦。」
佢啲語氣成個劊子手咁，懶理我嚟緊會上天堂定地獄；佢帶我入去嘅地方係舊式商住大廈，即係同鄉會，跌打館，耶青堂嗰啲聚腳地，當然重有各大環頭社團。
上咗兩層樓，我知佢嘅目的地係乜啦，好彩…幾驚係嗰啲表面做性病皮膚病實質做腎臟買賣嘅私竇診所。
我：「咪踢我入會啦，我無諗住學空手道呀。」
呢條女有無咁變態？見我打得兩下就想日日同我死過？
U：「無人要你學空手道呀，亦唔會有人免費教你，拎袋嘢嚟，唔好走咗去呀下，會死人㗎。」佢攞走袋衫就掉咗個書包畀我，行咗入走廊盡頭一個同佢格格不入嘅廁所。
我：「妳件黑色打底唔見咗嘅？」
U：「又唔係喺學校同你打，唔使著高領，有件運動背心喺入面。」我硬係覺得呢條女都係貪靚。
我：「我重以為…妳學興趣班實會喺啲高貴啲嘅地方。」
U：「講乜呀，我又唔係一出世就咁有錢，細個嗰陣我都係住呢度附近㗎咋，你唔好得罪人呀。」




個單位門口有幾塊牌，除咗空手道重有跆拳道，中國功夫呢啲，睇嚟就係一個單位幾個人夾租；都啱嘅，唔通一個禮拜教足七日空手道咩，呢啲教練好多都係副業嚟，就算診所都經常係朝早醫香港腳，晏晝醫尿分差，夜晚剝牙仔，半夜拍護士同婦產科AV呢啲咁。
入到去就同嗰啲八點半撈飯劇集入面嘅社團單位一樣，大大個長方型單邊向馬路全部窗，我諗有八百到一千呎嘅；正中間有個類似邪教教主成面鬍鬚嘅物體喺度打坐，兩邊就係學空手道嘅青少年男女，年紀望落最大都係得二十咁，而最細嘅就係小學生，男多過女好多，女仔呢邊計埋天王星都係得五個。
U：「除鞋啦，死仔包，唔使擔心腳臭喇，大把人臭過你。」乜喎，又唔係打完波…會有幾臭噃。
我：「不如妳話我知叫我嚟做乜先啦。」
U：「一陣你咪知囉，唔通叫你嚟昅女咩，警告你呀，唔好打呢度女仔嘅主意呀，打死你㗎。」
我：「即係我首先就要打妳主意，打贏妳先。」
「Uranus姐姐，妳嚟到嗱？」
U：「係呀，今日會有個死人頭，即係呢個，嗌佢喂就得㗎喇，會嚟幫手做活靶。」我屌…乜咁虐待我呀。
「活靶…真係？點打都得？」
U：「係，妳哋鍾意可以練某下技，甚至乎同佢組手都得，佢好硬淨㗎…嗱，呢兩嚿嘢畀你用。」佢掉咗兩個大臂靶畀我，即係要我硬食任人打啫。




我：「執靶同握靶都好啲吖，呢嚿嘢食晒力㗎喎。」
U：「你頂得住㗎喇，佢哋唔係好大力你唔使避，範圍大啲對你嚟講重安全。」