【代糖故系列】《她被寄宿到屋邨男孩的家中》: K374

U：「著鞋啦，真係夠鐘走人喇。」
又一場鬧劇，終於可以離開呢度，睇佢著白襪仔反差到…
我：「嘩嘩嘩！」佢著完鞋一嘢彈起身跳喺我前面。
U：「攪乜呀！使唔使我一過嚟就扎行馬十字死光咁。」
我：「我想嘅咩…妳出現喺十cm內夠嚇到我著超人燈…」
U：「唔得閒同你玩埋啲低B嘢，留返畀你個右女神。」
落樓梯我都讓佢行先，因為佢真係好恐怖。
U：「喂！你行去邊呀？」佢一嘢就扯實我手腕。
我：「咪行返去搭地鐵囉，我唔熟呢度啲巴士。」
U：「我有話過咁快放你走喇咩？」




我：「女俠妳放過我啦，重想捉我去邊？就算妳而家話約我去開房嘅話我都會夾著尾巴逃走㗎喇。」
U：「無興趣同你玩恐懼鬥室呀，陪我買少少嘢先。」
我：「做乜啫…又過咗嚟做妳哋嘅靶，又已經正正經經咁同妳決鬥咗一次，都算係我贏啦，件事就咁完好無？」
U：「係，頭先你贏咗，你唔攪我係你嘅事，呢件事完咗，但你唔好唔記得喺學校輸咗，到年底都係我阿四嚟。」
我：「唉，妳贏喇，想點就點啦，我無力反抗。」
U：「唔準發晦氣，幫我孭書包，跟住我行啦。」佢遞咗個書包畀我，呢啲嘢我都慣，但佢竟然同我十指緊扣…
我：「女班長…妳咁樣係想點，會唔會…唔係幾好？」
U：「有乜唔好，又唔係未試過。」
我：「妳係專登捉我左手嘅？」
U：「梗係，你左手唔夠我右手大力唔驚你走得甩，如果捉你右手俾你反制點算？」




我：「妳重著住校服，成街都係人望住…妳唔驚咩？」
U：「呢頭唔近學校，平時我都好少可撞到先生同學。」
我：「係啫，唔怕一萬，最怕萬一吖嘛。」
U：「哈，好似驚嗰個係你咋喎，如果俾人見到，你同Queenie實有排煩，我又唔係要俾人追，又唔係要溝仔，對我無影響㗎喎，無男仔黐埋嚟嘅話重好。」
的確，QQ講過同我熟咗之後少咗好多仔埋身。
我：「佢點會吖，有拖拍佢理我嚟做乜，叫我食埋妳就有份，就算係都係驚妳哋姐妹鬨牆多啲。」
U：「鬨你個頭呀，係兄弟鬩牆，唔識就咪亂噏啦！」
雖然佢中文係比唔上QQ，但窒人嘅氣勢絕對無分軒輊。
佢帶咗我嚟一間好傳統嘅三餸飯街鋪，入面得兩張枱嗰啲，稍有要求嘅人都唔會選擇喺度堂食。
「嘩！阿女，今日咁犀利帶埋男朋友仔嚟呀？」




U：「唔係男朋友喇，佢追緊我，重係觀察緊咋。」吖，頂妳個肺吖，咁樣老屈我都得嘅，但又無理由踢爆佢。