【代糖故系列】《她被寄宿到屋邨男孩的家中》: K382

為咗成全QQ嘅爽，我捱住眼瞓好早就返到學校。
我：「既然唔使返嚟開門，做乜咁早返嚟？妳咁樣攪到我嘅犧牲好似毫無意義咁。」過咗三分鐘佢就返到嚟。
U：「關乜事，我係慣咗咁早返嚟，而家唔使趕頭趕命我覺得好舒服喎，而且你有無意義唔喺我嘅考慮範圍入面。」明明琴晚咁溫馨，一返到嚟又好似換咗個人咁…
我：「係嘅係嘅，靚女講乜嘢都係啱嘅。」
U：「殊，唔好咁大聲，有其他人喺度㗎。」
話妳暴力就嬲爆爆，讚妳靚女又唔得，實在夠晒難捉摸…有專車接送嘅幽蘭亦都好快返到，然後就坐咗喺男班長個位度同天王星一齊對M2數，呢個Myth應該都係唔鍾意早起身，所以就謦好咗佢負責其他嘢，而佢亦無參加風紀呢啲扮乖仔乖女嘅邪惡組織。
雖然我同啲女神『們』都過從甚密，但呢個鐘數喺課室乜都唔做得確實好浪費時間，唯有死死地氣咁攞啲英文工作紙出嚟做，YY返嚟一見到我個死人樣就喺度奸笑…
可能令佢有得將快樂建築喺我嘅痛苦之上就係我最大嘅貢獻…哼，妳咪當我廢柴囉，雖然妳哋永遠都唔會知道我其實唔會輸比天王星，只要佢自己知道就得。
鄧：「各位親愛嘅同學早晨，我哋嚟開始教書喇…」
所謂嘅班主任節，永遠都係俾先生騎劫嚟教書嘅時間，尤其係當第一堂就係佢負責嘅話。




鄧：「上次你哋做嘅說話練習，份稿我就已經睇晒嘞，不過就未聽啲錄音，不如我哋而家全班一齊聽下咯。」有時我覺得佢真係喺度扮傻，明明啲行徑就極度挑戰性…
「嘩，乜咁攪呀？Miss我哋亂錄㗎咋…」
鄧：「所以做功課係應該認真，無論計唔計分都好。」
「唔好咁啦…不如，揀啲優異作品嚟俾我哋欣賞咪算。」
鄧：「唔得，完美嘅嘢係好難複製同學習㗎，相反，從錯誤之中學習就容易得多，如果唔係，我印份marking scheme畀你哋咪得囉，咁我就唔使教書同改簿。」
「好老尷喎Miss，咁樣妳會令到我哋有學習陰影㗎…」
鄧：「如果你哋唔認真學習，第時收到份DSE成績表所得到嘅陰影大到用積分都計唔到呀，實夠你哋用成世…記住，呢個年代人無恥便無敵，只要你唔尷尬，尷尬嘅就係人哋！所以保持禮貌微笑就得㗎喇。」
呢個先生又話自己唔識計數，重要喺度講潮語…
易：「哈哈，又係嘅，我哋呢班好似有同學特別精於此道。」係呀？唔通話緊我？乜你唔覺得尷尬㗎咩？
鄧：「好，事不宜遲，我哋就嚟聽下啲錄音先。」