【代糖故系列】《她被寄宿到屋邨男孩的家中》: K385

我：「哈…我都係靠幽蘭先識講嘢咋，不過件事都完咗，算啦，或者下次真係可以我哋一組，但你唔似因為佢哋而心情差喎，唔通乃木坂啲新歌上唔到公信榜？」
龜：「點會，雖然佢哋因為有好多成員畢業而耷咗少少，但仍然好穩定首首歌都上晒榜。」
我：「咁…唔通因為非洲手抽極都抽唔到SSR？」
龜：「唔係，呢排無課game抽卡。」
我：「咁緊要，唔通你戒咗呢個燒錢活動？」
龜：「其實…因為真係無錢…」
我：「唔會掛，我記得你啲零用錢都OK多，暑假唔使返學咪重少使費，定俾人cut咗？」
龜：「課咗去第二度啫。」
我：「有乜嘢吸引到你連抽女女卡game都唔課咁巴閉？」同佢講嘢十足十落口供咁款…
龜：「課咗…落一個…香港嘅…女仔度。」




我：「課…現實嘅？虛擬嘅？」我都識VTuber呢啲嘅。
龜：「係一個…網上面嘅女仔，真人嚟。」
我：「唔係呀化…賣相？賣片？賣隨身物件嗰啲？」
龜：「類似…大概係咁。」
我：「實不相瞞，我都係鹹濕仔一個嚟又點會唔知呢啲嘢，你想睇我可以抄畀你，但課金落去電子雞度連打一八三四六…」
龜：「佢唔係電子雞嚟呀！」差啲噴埋粒魚蛋出嚟。
我：「咁…唔係囉…其實我都唔知你課緊乜。」
龜：「算啦，其實你都唔知，佢係女主播嚟。」
我：「女主播…欸，佢係正經定唔正經嗰隻先？」
龜：「梗係正經啦，人哋係音樂女主播嚟！嗰啲剩係識除衫同埋賣肉嘅低等女人我先無興趣睇。」QQ又真係無乜除嘅，反正佢唔使出樣一坐低就係咁性感，嗰啲波罅，嗰啲大髀，嗰啲薄紗…我都唔識分乜先係正經咯。




我：「但你明明淨係迷日本idol，點解會突然之間課金畀香港女主播嘅？」
龜：「因為…我都係周圍surf下，見到個女仔喺度彈琴，咪問佢可唔可以彈乃木坂囉，點知佢真係即刻走去聽一次然後彈畀我聽，所以咪鍾意咗佢。」
我：「原來…係呢，佢係咪好靚㗎？」
龜：「人哋唔出樣㗎，靠藝術高度取勝。」
鍾意一個人，真係會偏心到乜嘢大話都講得出。
我：「咁唔會係黑屏得琴聲呀？實影到少少嘅…」
龜：「其實除咗頭之外都影到，亦係非常高質。」
我：「既然係咁，share下你女神嚟望下吖。」
龜：「點得，一陣你去攪破壞講埋晒啲唔三唔四嘅嘢…」
我：「唔會啦，知你鍾意佢，應承你我唔會走去搵佢，睇下佢有幾高質咋嘛，我身邊咁多女神邊得閒攪咁多嘢…」




龜：「咁…淨係睇一陣㗎咋。」然後佢開咗段片。