【代糖故系列】《她被寄宿到屋邨男孩的家中》: K391

我：「吓…邊係咁計㗎，學生本來就應該平啲㗎啦。」
Q：「妳諗清楚未㗎？其實我哋都唔係話咁大需要…」
V：「妳同我講過話最唔慣係無咗個會所吖嘛，呢度都叫平平地又近你哋屋企，我已經過埋數畀人哋㗎喇，如果妳唔肯要嘅話，我就直接成間鋪買咗佢然後免費畀你兩個玩，嘿嘿。」佢夠晒任性同跳脫。
Q：「傻嘅咩，呢啲鋪一間隨時要過百萬㗎。」乜…個銀碼真係重點嚟咩？我望下啲機，每部怕且要一兩萬嘅，裝修簡簡單單都二三十萬，重有上期，人工…
V：「咁可能有賺呢，搵埋妳做代言人，樓下貼滿妳嘅poster喺度，叫妳日日喺度做gym吸客，可能一年就回返本都唔出奇！」如果work嘅話妳自己做都得啦…
我：「咁…我出返自己嗰份啦，除開一個人幾錢呀？」
V：「唔使啦，你都會生日嘅啫。」
我：「我唔可以受妳咁多好意…妳話我知幾錢啦。」
V：「真係硬頸，本來一人六千，而家即係四千蚊一年，係畀到先好，如果敢餓親Queenie嘅話我唔會放過你。」
我：「OK嘅，我會安排時間還返畀妳。」




V：「慢慢啦，不過你講過我唔會唔記得。」
然後姐姐幫我哋填form影相整卡…呢個時候管家先生都上埋嚟，望咗我哋幾眼叫我哋自己玩唔使理佢。
我：「妳管家都係嚟呢度玩㗎？」
V：「佢係呢間公司會員好耐㗎喇，而且要佢做成人會員幫我哋擔保先入到會，佢平時返工等我哋啲空白時間就會上嚟玩，例如我溜緊冰嗰陣。」
估唔到有一日我終於可以同QQ喺健身室一齊做gym…自從識咗佢開始，我身邊所有嘢都唔同晒，就連傻仔健都喺QQ嘅直播業務連帶蝴蝶效應下破埋處…相比之下其他嘢簡直不值一提。的確喺呢度做運動唔會有蚊，唔會曬黑，有冷氣歎係舒服好多嘅，但做運動本身就講求刻苦忍耐，喺烈日下脂肪亦燃燒得更加有效率，所以都幾矛盾下。
但佢兩個又唔係天王星，唔同嘅。
V：「交叉仔你認真啲呀，如果唔識得用啲器材唔該掃個QR上網睇教學，唔好興奮得滯樂極生悲。」
我：「知喇…咁我去試下部單車機先。」
咁大個仔第一次玩呢啲嘢…以前成日覺得望住埲牆踩單車好戇居，但原來有得好似打機咁set路線上山落山，重有得跑圈玩time attack迫你越踩越快，望住個距離、速度、熱量計，我開始變得越嚟越沉迷…