【代糖故系列】《她被寄宿到屋邨男孩的家中》: K397

Q：「呢一萬幾千對佢嚟講都唔係錢嚟㗎啦，唔係佢出手大方你呢啲死人頭又邊有得嚟玩，個個都係你嘅話唔使幾個月就蝕本執笠啦，其實好多OL join完都係一個月嚟玩兩三次㗎咋，主要係為咗心靈滿足同社交用…」
我：「咁又係，我好歹自己畀咗錢，我打算呢一年最少要嚟一百次！咁即係每次四十蚊同食餐平飯差唔多，就咁話啦。」一年有五十二個禮拜即係每週兩次。
Q：「哈，然後每次做完777卡路里又要嘥錢食多餐。」
我：「食可以平嘅啫，但身體會好咗吖嘛。」
Q：「其實幽蘭佢哋呢啲，有時去酒店做spa，游水做gym再食埋飯，一日就已經使三四千蚊㗎喇。」
我：「我都知…係咪好羨慕…想搬去同佢住喇？」
Q：「咁又唔使，同你住，可以一齊嚟玩下我已經好開心，不過呢，估唔到你一開口就話要畀返自己嗰份，始終都唔少錢而且又唔係你自願嚟，你…好似大個仔咗咁。」
我：「幽蘭係好女仔嚟㗎，雖然對佢嚟講係微不足道，但我想佢知道我係重視件事，唔想佢覺得我係黐飲黐食嘅男仔，而且佢已經幫咗妳太多…」
Q：「嗯，我真係無得還畀佢…不過你都唔好餓親我。」
我：「點會餓親妳呢？使唔使幫妳粒震震蛋換電呀？」




Q：「講唔夠幾句又係呢啲！食屎啦！」做完gym我覺得自己啲胸肌厚實咗，唔會再怕佢對我嘅重擊。
但天王星就唔好喇，呢個女人真係打得死人。
我：「係嘞，我今日晏晝同咗細龜食飯呀。」
Q：「喂，你想點呀，最好唔好亂嚟攪到佢懷疑你知道件事喎。」
我：「梗係唔會啦，但佢認咗迷緊一個直播女。」
Q：「哦，我都知…咁對件事情會唔會有任何幫助？」
我：「睇怕就唔會，似係勸佢都唔會停嗰隻。」
Q：「我知吖，放咗學佢就message嚟，我重諗緊點覆佢好，唔想拖到聽日先處理。」
我：「本來我以為佢都係沉迷你嘅美色，但原來佢真係好認真，對妳一片痴心咁，我一講直播啲惡劣文化佢好似即刻想起身打鑊我咁。」
Q：「唉，我都覺得自己好惡劣，收啲鹹濕佬錢的確係幾痛快㗎，但身邊嘅同學竟然會咁…我想象唔到佢知道真相之後會有幾大反應，實在唔敢用真身見佢…」




我：「無㗎喇，等佢自然消失啦，佢喺度妳都唔使再搞活動。」老實講等佢早啲知道現實嘅殘忍唔係壞事嚟嘅…
Q：「唯有係咁啦…重有，而家得返我喺度嘞，你個好朋友個樣全日食咗春藥咁到底係乜事？」
我：「咪講咗囉，A0有女就係咁㗎啦，我都羨慕呀。」
Q：「即係點呀，食埋嗱？」
我：「佢叫我唔好同妳講㗎…」