【代糖故系列】《她被寄宿到屋邨男孩的家中》: K403

Q：「係呀？細蚊親口同我講你以前迫佢吞過幾十次攪到嘔咁滯，但而家想再食多次都無得提供。」
我無言了，QQ一講完，我嘅反擊力就歸零。
健：「我諗…琴日同佢…喺張床上面同佢一齊睇netflix，佢突然之間肚痛就畀咗部電話我，然後我偷睇佢啲message所以嬲掛。」
Q：「乜嘢你諗，偷睇女仔電話係死罪嚟，無得救，就算呢條友同我一齊住咗咁耐都未敢偷睇我部電話。」
我：「唓，有乜好睇，費事睇到妳啲閃卡唔好意思咋。」
Q：「唔使唔好意思，我無閃卡提供，先無咁蠢。」
我：「不過…唔知點解有啲人會成日偷睇我個D槽。」
Q：「大佬，乜偷睇呀？！你自己鍾意嘅話可以set返使用者同folder權限，甚至加密埋都得，你畀得部電腦我用就預咗我會自由使用㗎啦，妳估我好想見到你儲啲似我樣嘅女優嘅AV呀？」
我：「兄弟，喺香港地永遠都係我哋做仔嘅錯，睇開啲啦…」佢無聲出…雖則我都覺偷睇message係死罪。
Q：「即係咁，偷睇還偷睇，你做乜要俾佢知呢…」




呢個QQ真係，佢都同我講過見到走光唔好同佢講。
健：「係咁嘅…因為見到啲唔應該嘅嘢，所以咪問佢…」
Q：「有乜嘢咁唔應該先？」
健：「我見到佢同其他男仔喺度調情，重係呢個禮拜…」
Q：「咁你點？即刻沖入廁所質問佢，再口誅筆伐？」
健：「無嘅…等佢出返嚟先問佢…」
Q：「你要自掘墳墓，我哋好難幫你㗎喎。」
健：「咁佢…明明同緊我一齊，唔應該繼續同其他仔…」
Q：「有乜應該唔應該？我夠可以話你唔應該咁快同個啱啱識嘅女仔上床，我咁講有無錯？」
健：「唔係我要求㗎…係佢主動，而且我有聽晒佢話。」




Q：「咁又點，然後你就可以偷偷睇人哋嘅私生活，再批判人哋應該唔應該係咪？」
健：「邊係私生活，我同佢都已經…」認真無眼睇。
Q：「係咪覺得扑完嘢佢就係你個老婆要聽晒你話？你同佢識咗幾耐？你覺得你有幾瞭解人哋？」
健：「呢個…我…」
Q：「你最多係瞭解佢嘅身體咋，佢讀書讀成點？佢屋企係點？以前拍過幾多次拖？佢鍾意你啲乜？」
健：「我…其實唔太知…」
Q：「咁佢有無講到明要同你拍拖，做你嘅女朋友？」
健：「其實無…但女仔唔應該…」同QQ辯論係死路一條…
Q：「重喺度應該，人哋咁易就同你上床，你諗下其他人會有幾難同佢上床，定係你覺得自己究竟有幾出色，而令到佢要迷戀你再獻身畀你？」
健：「點解…點解要咁…」