【代糖故系列】《她被寄宿到屋邨男孩的家中》: K410

Q：「但係如果佢唔解鎖，都唔輪到你唔放低啦。」
健：「係嘅…但個心…始終都會有佢喺度，抹唔走。」
Q：「真係唔明你哋，先識咗人哋嗰一陣，又要嫌人哋唔好，但又要沉船落去，都唔知話你痴情定係硬頸好。」
健：「我都唔知，但妳講得啱，我亦都諗清楚，我咁廢又點會識到啲真正嘅好女仔喎，就係因為佢唔好先會走嚟同我玩，如果佢好似妳咁完美嘅話，講一句我就自動自覺匿埋啦，但係…我好想繼續鍾意佢呀。」
Q：「黐線…我係鬼完美，但你諗清楚先好喎，大學生嘅生活隨時淫亂到你想象唔到，佢可能比你諗嘅更加仆街，我諗你都聽過呢個世界上有樣嘢叫hall雞，有好多嘢唔係你一個中學生可以承受到。」
健：「咁又點…都開咗個頭…你哋唔係話鍾意一個人就要包容佢嘅缺點咩？如果因為佢嘅優點而鍾意佢，我覺得只係叫欣賞，我真係鍾意阿Yan，就算佢唔好…或者遲啲我可以幫到佢呢。」
Q：「我欣賞你嘅真心同堅持，但關於你兩個嘅關係我諗我無嘢可以再評論，亦無可能日日安慰你，你要對自己嘅行為負返責任。」
健：「我明白，我好後悔…如果唔係一時衝動，我諗可以有更多機會睇晒佢啲history，知道佢究竟係點…」
Q：「你明啲乜呀，我咪講咗絕對唔可以睇女仔電話。」
健：「我唔再係想鬧佢…只係想瞭解佢同幫佢…」




Q：「黐線，人哋有無話要你幫呀？！如果你真係諗住認真同個女仔相處落去，最好永遠唔好偷睇佢部電話，除非有一日你夠膽直接問佢攞嚟睇啦。」
健：「係嘅…但都唔知佢會唔會出返嚟…」
Q：「係㗎喇，你覺得人哋其實需唔需要你吖？」
健：「我諗…唔太。」
Q：「哎吔，怕咗你，唔好又眼濕濕咁啦…你成日出咗嚟唔返屋企得唔得㗎，屋企人會唔會擔心你？」
健：「OK嘅，佢哋今晚出去食飯，我話去佢度玩…」
我：「我真係夠晒好用，同女扑嘢又賴落我度，情傷又賴落我度。」
健：「乜扑嘢就係我做錯咩？！你以前咪又係咁！而妳…」呢條友就嚟short上腦，竟敢直接話QQ…
Q：「喂，我從來無公開認過㗎…扑嘢本身係無錯，但你都要明白返背後嘅意思先得㗎…」
我：「扑嘢有時可以好純粹，何必執著太多…」




Q：「喂！你都係唔好再出聲…橫掂佢唔會咁快出現返，不如唔好講佢先，既然你喺度，開傳說直播下咯。」
健：「如果佢唔出現返…我諗住棄game，對唔住。」
Q：「咁認真…但都明嘅，你唔使自責㗎喎，直播呢啲我其實好閒，自己播或者搵其他主播都得…只係，以前見你兩個成日玩，而家咁樣實在唔係幾慣。」