【代糖故系列】《她被寄宿到屋邨男孩的家中》: K413

學繼續返，欣姐當然無搵返阿健，細龜亦都係無解。
自從健仔食咗欣姐之後佢就唔再係天真嘅小朋友，比起齋煩無女多咗其他各種嘅煩惱，雖則嚴格嚟講佢而家呢一刻都係無女，我亦都無；經過一日嘅沉澱之後佢嘅神情都冷靜返啲，但就換嚟一副要死不活咁嘅樣。
客觀嚟講我覺得佢哋只係企咗幾晚，實在無乜必要喺度傷春悲秋，不過初戀就係咁㗎啦，我明㗎喎，我真係明！
今個禮拜QQ將班長個位過咗畀Zilvia，班主任又真係由得佢哋亂嚟操作，結果又run得幾順暢，最重要係Zilvia好好人唔使我一大朝早返嚟開門，真女神稱號當之無愧。
而星期二我又要去做活靶…QQ就第一次去幫小朋友補習，可以話我哋兩個都好忙，暫時放低晒啲無謂嘅兒女私情；唔知係咪我個樣生得傻傻地嘅關係，又或者我可以目無表情打機咁攞住個靶墊擋晒佢哋啲拳腳，個個妹妹仔都好落力亦都好開心咁對我狂轟濫炸，其實單論年紀嘅話，天王星都係妹妹仔嚟嘅…而我就一路觀察其他師兄喺度練功，睇睇下我都覺得自己有少少長進，相信自己喺心念上面可以踢到一下比以前靚嘅半轉後踢。
※※※※※
東：「茜旎姐姐，妳使唔使準時到咁呀，重要走埋嚟學校門口接我，咪話咗喺我樓下…」
我：「一早去到你樓下啦，打埋電話畀你都唔過嚟，我先行多幾步路嚟睇下咋嘛，我應承咗妳媽咪要押送你返屋企做功課㗎，你再唔返去我就收到電話㗎喇。」
東：「使唔使咁認真呀，好似黑社會接放學咁。」
我：「有乜可能呀！淨睇樣全世界都唔會覺得我似黑社會囉，乖啦，而家一齊行返去。」




東：「之前個Miss大妳好幾年都無妳咁霸道…」
我：「你講乜嘢呀？係你媽咪吩咐落要睇住你㗎。」
東：「嚟啦，畀十分鐘我，買埋少少嘢食先返去。」
我：「做乜要嘥啲無謂時間，乜屋企無嘢畀你食咩？」
東：「十分鐘啫，好快㗎咋，妳當做少十分鐘嘢就得，放心啦，我唔會話畀媽咪知㗎！」
我：「喂！衰人東東，咪跑咁快呀！」
呢隻死細路…真係有幾分似中一版嘅阿爽，雖然佢細粒好多而且屋企環境好好多…但跑起上嚟就差唔多快。