【代糖故系列】《她被寄宿到屋邨男孩的家中》: K421

順便攞部電話出嚟望下，原來QQ喺半個鐘前已經私訊咗我唔返屋企食飯，明顯地即係…
我：「咁一齊食啦，橫掂我本來都係返屋企食自己。」
離開咗道場，佢就捉住我隻手扯住我行，但又唔係拖住我…都唔知想點，但係就有少少霸道，行嘅方向又係佢屋企嗰邊，我比較關心嘅係有乜嘢畀我醫肚。
U：「嗱，我無呃你㗎，係咪好平呢？」
面前係一間好地踎嘅港式飯店，比起大排檔隨時更加簡陋，菜單有燒臘飯，雲吞粉麪類，粥，重有蒸魚飯，呢啲餐廳已經近乎喺香港絕跡，唔係由細到大周街躝嘅小朋友應該會唔知我形容緊啲乜，我更加想象唔到貴為女神嘅佢會嚟呢啲地方食飯，QQ就話而家迫住同我捱啫…
我：「唔錯，咁入去啦。」
入到去就見到個黑面老板娘，應該係呢度嘅標誌兼特色嚟，但望落個燒味架上面啲叉燒又幾靚喎。我隨便就嗌咗個四寶飯多飯連例湯加凍奶茶，五十蚊頭；佢就嗌咗個燒鵝髀飯再加油菜…是但啦，佢食幾錢都唔關我事。
U：「太好喇，有你同我嚟食成件事自然好多。」
我：「做乜呀…如果得妳自己一個會唔敢嚟食咩？」
U：「又唔係，不過感覺上硬係會有啲怪怪地。」




我：「啊，原來係搵我嚟做飯托，咁妳放心食多啲啦…」
兩碟飯咋一聲就送到上嚟，一望就知道呢度出品嘅燒臘係唔錯嘅，一定好過我樓下街市啲外賣先，多飯又真係好鬼多，重可以自由加色，凍奶茶合格以上，例湯就好鬼鹹…不過都係有料嘅，整體嚟講叫非常滿意。
講真嗰句燒臘呢啲嘢係一分錢一分貨，無可能對街市啲平價貨有乜要求，就算大家樂啲叉燒都隨時成排柴咁，但我對嘢食嘅需求又好寛鬆嘅，唔好呃我錢就得；如果我厚面皮啲嘅話應該可以叫幽蘭帶我去食啲珍饈百味國色天香，之不過我嘅慾望又未去到咁大，希望佢會好好咁包起QQ就得，眼前呢塊半肥瘦叉我收晒貨㗎喇。
U：「我分啲畀你吖。」佢夾咗兩塊上鵝髀過嚟。
我：「我無所謂嘅…妳鍾意食就留返自己啦。」
佢無理我，然後又夾返走我嘅紅腸同叉燒。
由細到大，我都唔覺得自己有乜嘢可取之處，稱唔上做靚仔，更加無可能係啲乜嘢男神，只係因為成日會喺條街識到唔同嘅人，同女仔相處比較得心應手，唔知係咪因為咁我竟有幸同到咁多唔同嘅女神食飯。
U：「其實男仔鍾意啲乜女仔㗎？」
聽到佢條問題，我差唔多噴埋臠緊嗰塊雞骨出嚟…
我：「吓…妳無端端咁問我，我實在係唔知應該點答。」




U：「有乜點答，如實答咪得，我又唔會鬧你嘅。」