【代糖故系列】《她被寄宿到屋邨男孩的家中》: K439

Q：「夠㗎喇，唔該晒阿貞，萬分感謝，我叫…阿David一陣forward我contact畀妳呀下。」
貞：「嗯，就係咁啦嘛？無其他嘢？」
我：「多謝阿貞妳嘅大恩大德，我得閒會掛住妳㗎喇。」
貞：「你真係未死過㗎喎，Kuromi幫我掌佢嘴啦，bye…」
收咗線，我嘅任務亦已經完滿結束。
Q：「死仔包！咁你都可以flirt女嘅？」
我：「沒練習太耐都要測試下㗎，如果唔係把口會生銹㗎，大姐姐見慣風浪都唔會介意呢啲㗎啦。」
Q：「理得佢介唔介意，拎張嘴過嚟呀。」
我：「嘩，乜妳真係聽佢話㗎，同佢有親？」
Q：「女仔梗係幫返女仔㗎啦，就等我收拾你！」




我：「哎吔，唔好玩住先啦…我要share聯絡人…」
Q：「鬼叫我咁大個女仔喺度你唔練習走去騷擾姐姐！」
我：「我做乜要flirt妳？係咪想我讚妳同天王星一樣咁暴力？」可想而知…我個嘴仔呢…
做完該做嘅嘢，我哋剩返嘅就只有等。
我：「妳覺得欣姐佢會唔會搵妳？」
Q：「唔重要呀，佢搵唔搵都係咁。」
我：「吓…點解咁講？明明咁辛苦先留到個電話畀佢。」
Q：「如果佢搵我，即係佢都想件事好，咁我咪睇下有無嘢可以幫到手囉，如果佢唔搵我，即係佢決心做個不知所謂嘅女人，咁我就可以慳返啲功夫，而你個好朋友…就應該慶幸可以及早抽身，少接觸呢啲姐姐為妙啦！」
我：「妳講到字就妳贏，公就人哋輸咁樣嘅…」
Q：「成功人士係咁㗎啦！有無聽馬斯克先生講呀，如果火箭成功發射就係成功，但如果發射失敗，就即係成功搵到設計嘅弱點同改良嘅方法，可以為下次發射成功做更加萬全嘅準備，真正嘅成功係瞭解因何成功因何敗，而唔係亂打亂撞扑中咗。」




我：「哦，係，馬斯克成功，咁馬克斯又成唔成功呢？」
Q：「收皮啦你！我而家唔得閒同你攪爛gag呀，自己去wiki同history書搵答案啦。」
啱嘅，亂打亂撞咁食QQ唔係成功，一定要光明正大名正言順知道自己點解食到佢先叫成功，但我而家剩係知自己點解食唔到佢，睇嚟我最後都係會失敗收場。
無所謂啦，起碼有馬沙陪我，掟個小行星落地球咁簡單嘅任務都可以俾阿寶攪攪震叉禍。