【代糖故系列】《她被寄宿到屋邨男孩的家中》: K455

我：「你第一日識啲港女咩，呢啲係香港嘅非物質文化嚟，有疑問可以問你隔籬位同學，我唔識答你。」
健：「咁我係咪一定要唔出聲等到下星期六呀？」
我：「你鍾意啦，不過如果人哋嬲咗千祈唔好話我知。」
健：「唉，重以為今個中秋可以唔使自己一條友過。」
我：「呀，原來咁快就中秋…唔怪之得頭先舅父message我，都未睇添，你都係乖乖留喺屋企同家人團圓啦。」
健：「中秋咁重要你都可以唔知嘅？下星期一補假呀。」
我：「使乜知，而家跟住個女神我根本無錯嘅機會，同埋我喺窗口望下都知使唔使返學啦，就算返錯又唔會蝕，落街食早餐囉…中秋，而家條街都無人玩火啦，得啲小朋友喺度玩螢光棒，我專心返工好過。」
健：「Hea得你吖，食個月餅都要掛？」
我：「我無買呀，你知啲月餅幾貴㗎啦，又越嚟越細粒，連帶啲大月餅都加埋價，我去阿婆度咪有得食囉，其實乜嘢節都好，身邊有人陪自己咪得囉。」
健：「你明知我…重講埋啲咁嘅嘢潤我。」




我：「傻啦，佢搵返你應該要開香檳，重諗咁多無謂嘢做乜，其實我都無人陪，聽日班女神要開生日兼中秋晚會，而我就喺酒樓做到隻屐咁。」
健：「唉…都唔知佢中秋身邊會唔會有其他男仔。」
我：「如果有又點？你真係咁諗嘅話不如早啲斬纜算。」
健：「但係我唔捨得呀，好想搵佢，好想快啲見到佢…係呢，咁Queenie都有男朋友，你係咪一樣咁鍾意佢？」
我：「你…唔可以咁講㗎，鬼叫我同佢一齊住，我哋嘅感情唔止係鍾唔鍾意咁簡單，就算佢有無拖拍都無影響。」
健：「如果阿Yan本身有仔咁我點算，其實我係咪做緊第三者？」我好想攞隻鐵羹敲醒佢，大聲同佢講，第三者你個頭，你只係一個淫娃姐姐嘅性玩具嚟咋！
我：「呵！呢啲嘢就好難講得埋喇，但我覺得好女仔就點都要爭返嚟嘅，學似Queenie話齋大把仔有得佢揀，所以…我都諗唔到任何原因佢要揀我。」
健：「如果…我做到佢身邊最好嘅男仔，佢係咪就會同我一齊？」
我：「嘩，最好嘅男仔，真不得了喎，咁係咪最有錢嘅男仔先？重有樣…身高…」
健：「我…可以做對佢最好嘅男仔…其他同佢玩玩下嗰啲都唔會認真㗎啦，係咪先？」佢個樣天真到我想賣電子零件或者加密幣畀佢，等佢繼續堅信做一個好人可以溝盡天下美女。




懶得理佢，繼續食飯，反正我自己都係泥菩薩過江，而佢呢餐飯就間斷咁望咗十幾次欣姐send畀佢嘅message。