【代糖故系列】《她被寄宿到屋邨男孩的家中》: K460

游下停下又時不時望下嗰三個女仔，講游水就真係夠晒水皮，咁樣學法都唔知要學幾耐先識；我無繼續走去撩佢哋，但就會互相對望到咁囉，我又唔會尷尬嘅，如果妳哋唔會唔舒服嘅話我大可以大大方方咁昅女。
到佢哋走嘅時候頭先個妹經過我哋隔籬都有揮一揮手，而另外兩個就向我略略點頭咁，或者佢哋會好奇怪我點解望住佢哋又唔走埋去交流掛，當然如果佢哋做主動嘅話我都無任歡迎嘅，但現實條件就係唔畀我做太多無謂嘢…
我：「佢哋去沖身喇喎，蘇州過後無艇搭呀。」
健：「咁咪走囉，可以點唧，我哋又唔入得去嘅。」你唔係咁大想頭想入女更放題呀？你可知道啲肥師奶…
我：「出口得一個，如果而家一齊走，我哋沖身實快過佢哋，出到去撞到咪當識多幾個朋友囉。」
健：「唔使喇，無需要。」
我：「你肯定？以前嘅你唔係好想識女嘅咩？」
健：「以前啫，而家我有Yan一個就夠。」
我：「唔好話我唔點醒你，你估佢一定會同你喺埋一齊㗎？就算係，亦都有可能唔知幾時分手，身邊有幾個親朋密友喺度，等你可以隨時無縫轉會都唔出奇。」
健：「唔啦，唔想咁樣諗佢，如果真係唔得就算啦…識其他女都無乜意義，咁你呢？想趕出去撞佢哋我都可以陪下你嘅，係唔知邊個啱你心水…」




我：「無一個啱，日日對住堆女神，呢啲就算啦。」
健：「…，以前唔明白你點解對住啲女都忍到，而家終於輪到自己體驗返，係呢，韻婷嗰陣真係想溝你㗎？」
我：「唔重要吖，我好惜佢，所以唔可以破壞佢幸福。」
游完水之後我哋上咗MTR，向各自嘅長輩屋企出發。
健：「喂，啲社出咗IG post呀，嗱，紅社準幹事！」
我：「乜春準吖，條友冧莊，都唔知有乜好出post。」
健：「其他有換人吖嘛，我係叫你睇呢啲。」佢show左右女神畀我睇，兩個都上咗淡妝用學校背景嚟做寫真，貴為女神佢哋like數就梗係爆過主席好多，轉眼間就已經二三百個讚，另外亦留意到嗰兩個中三妹都係度，有幾十讚。
我：「我平時慣咗索住味咁睇佢哋，唔得閒用放大鏡嚟睇相。」唔係扮嘢，而係真漫不經心…
健：「其實呢，瘟神呢啲係咪真係算係靚仔？」
我：「你咁問我，身為男人嘅我實在係唔知點答你好，你問我邊個AV男優勁抽就話有客觀答案啫…我嘅理解係，佢都幾sharp醒，夠精神同埋有活力囉。」我亦好佩服佢明知QQ有仔都夠膽表白追人，但健仔就最好唔好知太多…




健：「都係，但我覺得你條友好似重受歡迎過佢。」