【代糖故系列】《她被寄宿到屋邨男孩的家中》: K464

Q：「即係而家你喺度彈劾緊我淫底咁話啦？」妳認㗎？
我：「點會喎，正常需要嚟啫…人生在世都係想過得歡樂，妳淫底我又唔會蝕底嘅，重益晒我添，只不過我喺度擔心緊，妳今世對我咁好我下世就要做奴隸還債。」
Q：「唔使擔心，你今世已經做緊我嘅奴隸。」
佢講完就嘴咗埋嚟，對住佢我已經唔知變硬定變軟好。
Q：「喂，不如真係出去賞下月咯？」
我：「吓…唔使啦，中秋節呢啲年年都有㗎啦。」
Q：「係咩，但我見你個傻瓜拎住個月餅好似好興奮咁。」
我：「興奮條毛，啱啱做到我仆直咁滯呀…同埋，妳唔係啱啱先同佢哋賞完月嚟咩？」
Q：「嗯，一陣咁啦，而家輪到你好唔好？」
我：「妳咁講到，我當然話好㗎，咁…使唔使帶埋個月餅出去做道具？」




Q：「帶乜鬼吖，咁大嚿你留嚟做早餐啦，佢哋畀咗好多粒月餅我呀。」佢打開個紙袋，入面就載滿晒啲新潮月餅，有餅形，有圓形，粉紅色綠色以至黑色都有。
我心諗，長洲芒果大糯米糍都可以話自己係月餅再加價…
我：「係呢，妳有無買到？有無得同佢哋交換呀？」
Q：「換乜鬼，我話我媽咪都唔興買呢啲嘢就得，佢哋都係攞屋企收到啲嚟玩咋嘛，如果你想食大月餅返到學校可以問佢哋攞添，幽蘭同天王星屋企大量，係啲客送嘅…」
我：「唔使喇，我唔想糖尿病住。」
然之後QQ喺我面前換衫，正確嚟講係除咗個Bra再著返件白色嘅超短身低胸入膊Bra top，其實同Bra都無乜分別，再笠埋條灰色膝上瑜珈褲上身。
我：「賞月要咁著嘅咩？妳諗住去邊呀？」
Q：「橫掂都未沖涼，順便行去做gym沖埋囉。」
我：「其實妳著到咁…同齋著內衣褲出街有乜分別？」
Q：「無乜㗎咋，不過你鍾意吖嘛，咁夜條街無乜人啦。」我都知…但萬一俾其他同學見到就即死。




就嚟一點，正常中學生應該乖乖返晒屋企，既然妳唔驚死嘅話我梗係捨命陪淑女啦，換條運動褲就手拖手出門。
講真吖，拖住個咁嘅仙女，隻眼重邊得閒睇嗰個發光圓形，得個曬字，簡直就係光害嚟。
Q：「你頭先同婆婆佢哋食咗乜呀？夠唔夠飽？」
我：「咪嗰啲茶餐廳style嘅大排檔，嗌咗幾個小菜，有飯食我就飽㗎啦，咁妳哋呢？」
Q：「幽蘭話想食中菜，所以呢…就食咗片皮鴨，芝士焗澳龍，燒味拼盤，蜜椒脆鱔球，三鮮炒和牛粒，瑤柱扒豆苗，重有個杏汁白肺湯。」