【代糖故系列】《她被寄宿到屋邨男孩的家中》: K484

就係咁，我投咗四年嚟第一次嘅SU票，先知道原來得一個內閣都重可以有得揀，就係反對當選，唔怪得佢哋都仍然要滿面笑容咁叫其他同學仔投票，真係好假呀！至於嗰張政綱，乜嘢文具售賣，雨傘借用，商鋪優惠，便服日…等等，對我嚟講都係算吧啦，SU唯二有用嘅嘢係啲SU紙同埋部影印機，但我實在係睇唔出呢兩樣嘢點解係要靠SU提供，就等如點解校簿喺圖書館賣一樣。
咪又係啲先生安排！整色整水浪費人力物力。
放咗學YY就邀請班金蘭姐妹一齊落去爭取埋最後三十分鐘投票時間，真係夠晒惡毒，試問有邊個低form男仔頂得順佢哋五個；當然我係唔會關心佢哋嘅公眾活動嘅，無事無幹嘅我就返屋企先，過咗陣班group就響起乜乜內閣已獲幾幾幾贊成票下成功當選嘅廣播，YY出嚟講咗兩句感謝同班同學嘅支持；然而，我關心嘅係另一個嚇人嘅訊息：『爽大佬，想問吓…你仲係未一個人住？』
我嚇到即刻quit出去唔在線，千祈唔好咁快已讀佢。
我唔太清楚佢咁問係代表乜意思，只知道我應該等埋QQ返嚟再從長計議，以免老馬失蹄。
我：「女神女神女神女神，今次大鑊喇！」
Q：「又點呀！煩膠…」其實我都知佢好多嘢煩。
我：「佢send咗句咁嘅嘢嚟呀，妳覺得即係點解呀？」
Q：「吓…唔係呀化…佢使唔使咁無所不用其極。」
我：「咁佢咁問即係乜意思，唔會係妳講漏口呀？」




Q：「梗係唔會啦，應該係…想借你間屋嚟用啫。」
我：「吓？借我間屋可以攞嚟做乜，又亂又細…」
Q：「咪…滿足佢個所謂不見面的約會囉，佢琴晚先同我講話可以黑布幪頭同我出街，我梗係睬佢都傻啦，係呀，佢係見唔到我，但條街啲人見到重唔影低放上啲乜登物登咩，到時我只會死多幾錢重。」
我：「明知無可能嘅嘢…佢咁都講得出嘅？」
Q：「你又唔係唔知佢嘅，平時剩係匿喺屋企過佢嘅生活㗎咋嘛，諗到想點咪直接講囉，點會理其他人有乜反應，你係咪無見過嗰個幪面超人迷點樣喺架人山人海嘅地鐵車廂入面練變身？」
我：「無呀，未親眼見過，我知佢攞奬咋。」
Q：「又好似啲巴膠咁，當條馬路係自己嘅衝埋出去，當架車係自己嘅喺入面走來走去影相騷擾其他乘客。」
我：「妳唔好再形容啦，我聽到都覺得尷尬。」
Q：「總之…佢哋真係好得人驚，真心膠重恐怖過啲變態佬，有啲女僕都會遇到呢啲客，以為幫襯咗妳就係佢個公主咁，而唔知自己喺度騷擾緊人，重以為自己好nice好親切表達緊心意，所以我先話死都唔要佢煩住我。」
我：「妳咁講又…阿健其實都差唔多。」