【代糖故系列】《她被寄宿到屋邨男孩的家中》: K501

QQ呢個時候經過我身邊嗰陣不屑咁望咗我一下，然後就成個女強人咁孭住部琴推閘走人，她也不算是輕輕的走了，遺留下兩條毒撚在陋室之中；當閘聲完結之時，我睇到眼淚從細龜嘅眼罩下緩緩流出。
唉，無眼睇，我戴罩攤返喺床上面算。
我喺度諗，呢個世界欠咗QQ一個港女版嘅諾貝爾和平獎…
良久後的龜：「爽大佬，可以除返個眼罩落嚟喇。」
我：「爽乜鬼吖，聽落…你好似爽好多咁喎。」我望一望佢，啲神情有少少扭曲，唔知佢係狂喜未完定悲從中來喇，我只知道世間上好多嘢都係稍縱即逝同不靠譜。
龜：「係，佢真係完美嘅女神嚟，你身邊嘅完全無得比，我唔知點講好，佢絕對係一個真正嘅仙女。」係咩？我覺得魔女妖女天仙局女形容佢會比較貼切。
我：「你開心就好啦，不過我剩係幫到你一次㗎咋。」
龜：「唔該晒你，放心啦，佢都唔會再見我。」
我：「都唔知你哋攪乜鬼，古靈精怪咁。」
龜：「呢啲嘢，你又點會明吖。」我唔排除有好多嘢唔明，但閣下唔明嘅嘢就肯定比我多，不過算了。




龜：「今次唔該晒你，我都唔好意思再打攪你，以後有乜嘢如果要幫手你就搵我啦…女王應該都走咗喇，我可以出門口返屋企。」
頂佢個肺，呢條友真係打完齋就唔要和尚，好歹我都大拿拿借咗間屋出嚟，你為表心意可以即刻同我落去請我食個tea嘅啫…不過我知道佢份人係咁，所以就由得佢無再講乜，橫掂我就唔係太得閒浪費咁多時間嚟應酬佢。
佢簡單咁執返晒自己啲嘢，然後就同我講再見走人。
我望一望佢有無攞漏嘢，因為如果佢返上嚟搵我就會好麻煩…希望佢唔會再得閒無聊失驚無神上嚟搵我就好，以前就話自己好悶無乜所謂，但而家呢度係QQ屋企嚟。
今日嘅收獲係古怪眼罩一個，我用過佢唔會要㗎啦？
我：『呀女王，佢走咗喇，妳可以返落嚟。』
Q：『你上嚟搵我吖。』你個衰妹真係。
我：「做乜呀，攞部琴上嚟就咁輕鬆，無力搬返落去？」
佢無應我，但就指一指樓下個巴士站叫我望落去。
Q：「唔使急吖，等佢上埋車先。」




呢個女仔實在係心思細密，機關算盡，小心眼得佢吖；等咗兩三分鐘條友就上咗巴士，我亦幫手抬返部琴同QQ落去，入到屋之後QQ伸咗個懶腰好似如釋重負咁。
我：「呀黑桃女王，妳做乜對人哋咁好呀？」
Q：「做乜咁同我講嘢呀，你好似有啲唔滿意咁喎？」
我：「點敢喎，不過我都係而家先知妳係個咁嘅女仔。」
Q：「乜嘢叫做咁嘅女仔？你呢個形容詞係乜嘢意思？」
我：「唔係要我畫出腸呀？咪就係會隨隨便便就畀人揸波嘅女仔…」