【代糖故系列】《她被寄宿到屋邨男孩的家中》: K512

V：「唔好咁得唔得呀？阿爽都唔似係壞人嚟啦，如果佢咁衰你都唔會俾我出嚟搵佢哋啦。」當要研討好同壞呢個問題我確實有啲心虛，打人我試過，偷嘢我試過，攪破壞我試過，強搶細蚊第一次嘅犯人係我…至於架車按道理就衰過我，我只係協助及教唆佢各取所需。
管：「妳可以咁講嘅，畢竟保護小姐妳係我嘅第一職責，但唔包括幫妳同爹地解釋任何事情㗎噃。」
V：「即係你要出賣我同邊個食飯俾佢聽啦。」
管：「唔好咁講，我只係唔會同我老闆講大話。」
V：「哦，咁你好耐以前負責湊我爹地嗰陣係咪又會聽晒佢話？」
管：「關於我以前客戶嘅事，請恕我實在不便透露。」
V：「哈，乜佢又唔係你老闆嚟喇？」
管：「嗰陣係妳阿爺出糧畀我，所以佢只係客戶嚟…總之，如果爹地問妳去咗邊，同邊個一齊，妳要自己負責解釋返，萬一佢之後唔准妳出夜街嘅話，到時我都幫妳唔到，請恕我唔可以違抗佢嘅命令。」
V：「得喇！我一陣會自己同佢報告返，唔使你操心。」
管：「不過妳好似重未問朋友仔嘅意向喎，妳知唔知道人哋得唔得閒，怕唔怕阻住人哋呀？」




Q：「我當然OK，今日可以唔使返屋企食飯。」扮啦妳，就算我要妳返屋企陪我食妳都唔會聽話啦。
我：「我九點半要去打工，之前嘅時間都得閒，不過…如果妳覺得唔方便嘅話我可以自己返屋企先都得。」
V：「唔准呀，你哋兩個就陪我去食晚飯啦。」作為一個街童，係咪會好難明白點解食餐晚飯都好似要入紙申請批准咁慘呢？其實又唔係嘅…以前健仔都要乖乖返屋企食飯做功課，無得陪我玩到夜一夜；至於阿康就…本身已經唔可以玩到日落，重有機會俾人沒收電話；至於我以前都會返去同阿婆食嘅，不過咬完又溜返落去啫。
管：「咁大小姐，請問嚟緊嘅行程安排係點？定係需要我為妳打點？」睇嚟佢平時真係跟到時間表足一足…
V：「我…想去K11行下街，然後食晚飯。」
管：「K11有兩邊㗎喎，小姐你識唔識分？」
V：「唔好明知故問啦，梗係去有海南雞飯嗰邊…」
Q：「管家先生，麻煩你車我哋去K11 Musea啦…」
管：「好，明白，咁我哋而家出發喇。」
講真吖，我作為一個清貧兼無乜物慾嘅屋邨仔，陪佢兩個行街實在有夠奇怪，呢啲商場對我嚟講係接近零作用，我喺度嘅唯二好處可能就係幫佢哋攞嘢同埋保護佢哋，但呢啲高級商場咁安全又點會有我用武之地；管家先生嘅接送服務實在係非常舒適，我哋咋一聲就已經去到K11嘅地下停車場。