【代糖故系列】《她被寄宿到屋邨男孩的家中》: K514

我：「我只係覺得Miss佢無拍拖，呢個男嘅可能都係佢嘅對像嚟啫，而且我覺得佢哋有啲襯。」
V：「有啲薯下薯下嘅眼鏡男，睇落斯文正經唔係壞人，其實…個樣都係似教書。」
Q：「呢啲嘢邊有樣睇㗎，Miss X咁爆咪又係先生嚟。」
我：「但如果假設佢哋都係單身嘅話，一條仔同時物色幾個女仔又無乜問題嘅，呢個年代咁開放。」
Q：「呵，咁Miss佢實無剩，呢個女仔靚過佢一大截囉…」咁…嘅話好似唔係無剩，而係一定剩囉。
V：「乜靚女就實贏㗎喇咩，會唔會有啲膚淺？」
Q：「你咪問下呢個膚淺嘅衰男人囉，呢樣嘢唔到我哋話事。」好喇喎，妳哋幾個咪又係鍾意靚仔。
我：「雖然好似好無聊，但我想研究下佢哋有無路。」
V：「贊成，咁樣都可以叫做關心自己嘅老師吖。」
Q：「你哋鍾意啦…橫掂今日大小姐先係老細嚟。」




點知跟咗唔夠一分鐘，佢兩個就好有默契咁一齊入咗周生生…而我嘅腳步就即刻煞停咗。
我：「點算呀，佢哋入咗金鋪…」
Q：「你認為普通朋友，或者同事同學會唔會一齊睇首飾？重要諗都唔諗就直行入去。」
V：「唔通係啲好貪錢嘅港女嚟，要鋸到條仔一頸血？」
Q：「有包有下文嘅年代已經過去，而家變成金條嚕。」
我：「但係點算呀，我哋喺出面望呀？」
V：「重使問嘅，梗係入埋去睇啦。」
我：「但係咁樣會唔會唔係幾好…」
Q：「又係你話要跟嘅，咪咁婆媽啦，橫掂我有嘢想睇。」結果我就俾佢兩隻捉咗入去，其實我覺得呢個擔心唔係多餘㗎囉，我哋三個細路著到咁sporty。
跟住兩個可以鬆容不迫咁行金鋪嘅中學生女仔，呢種感覺呢…其實唔太應該出現喺我呢啲咁普通嘅學生哥身上，片都有得你睇啦，時下嘅學生哥學生妹放咗學會去邊？行金鋪？講妳都唔信啦…




比起沙田嘅謝瑞麟，呢度大間少少裝修又再靚啲，望落啲貨亦更加grand，人煙多啲啲，連埋我哋個場總共有四pan客喺度，而呢度嘅服務生姐姐亦睇嚟更加專業，對慣大場面嘅佢見到我哋光臨並無覺得突兀，反而滿面陽光笑容咁招呼佢兩個，應該知呢個商場好很多呢啲後生嘅二世祖，亦唔係個個可以用外表嚟判斷。
Q：「唔該，我想睇下你哋嘅Sanrio系列。」其實我都估到，因為記得佢之前講過呢度有，唔通睇鑽石鍊咩？
雖然我懷疑幽蘭有能力喺度掃返幾盤貨走…不過我䁽一䁽一對又大又閃嘅紅寶石耳環都要兩皮，呢個能力好視乎佢屋企對佢有幾縱容，但係佢就連夜街都唔出得…