【士㞗彈系列】《她被寄宿到鹽水男孩的家中》2K15中: K920

去到而家情況，我同QQ，YY，甚至係天王星出街食飯撐枱腳都唔驚，因為有友情基礎就唔怕俾人唱，況且無人會相信我一個窮小子可以食晒咁多個女神，佢哋只會覺得係我俾成班女褻玩，雖則同現實相去不遠。
但加埋EX就實在係好怪，啲人一定會諗佢哋點連埋一齊，分分鐘就會開始估我同QQ嘅特別關係。
蚊：「點得喎，無理由我哋去開餐掉低妳一個㗎。」
Q：「或者…你哋食完剩返打包返嚟畀我囉。」
我：「如果兩位唔介意嘅話，其實我哋可以嗌外賣嘅…」
蚊：「如果真係驚俾人撞到唔方便，唯有係咁啦…交畀你做採購喇，你知道我哋食乜㗎啦。」
啲女次次都係使人唔使本，我又要比對一下邊隻動物外送最抵，就你啦，連鎖快餐二百減一百，睇你都係蝕住賣。
我：「想問下…如果係pizza嘅話妳哋意下如何。」
Q：「可以，正常口味，要芝心批。」
蚊：「好嘢！有芝心批食。」對中產以上嘅人嚟講，芝心批純粹係口味問題，但對公屋人士嚟講，加呢三四十蚊絕對係價錢問題，呢個差價夠嗌多個M記餐嚕。




好彩呢個世界有惡性競爭，幾隻動物蝕到傻都重繼續打架，等我可以漁人得利用三餸飯嘅價錢食到pizza，等於班女睇唔順眼QQ於是又黐埋嚟一樣嘅道理…諗多咗。
幾經辛苦，終於計到一款大批轉芝心再加隻炸雞係二零幾，埋單就一零幾，但食咁寡啲女實唔高興，於是我再去搶多張五蚊券嗌M記特價雞餐加大…而家起碼一人一件雞，重有啲薯條，屋企重有zero。
我：「咦，妳哋搞緊乜呀？」
Q：「見你無晒反應，我咪教細蚊做功課囉。」
我：「真係勤力，我落去攞嘢，好快有得食！」
跑完一轉M記，外送哥哥亦送埋個pizza嚟，開餐！
女仔係永遠唔會食超過兩件pizza嘅，而一般嚟講我又唔會食半個，所以理論上一定有剩。有時喺度諗緊我同健仔係咪上世喺文革嗰陣俾人鬥死，今世個天要補償返我哋，唔知有幾多人恨都恨唔到一間公屋可以放兩個女仔喺度，而且重幾溫馨添。
蚊：「想問下，平時得你兩個喺屋企會做啲乜？」
我：「乜做乜…喺屋企…咪住喺度囉，有乜特別嘢要做？」
蚊：「唔係呀！係問一男一女喺度除咗普通生活重會做乜？」做乜突然發神經質問我啲咁嘅嘢…




我：「佢有男朋友㗎，我可以做得啲乜喎。」
Q：「妳都知佢鹹濕到爆，就算無得攪我重有大把嘢可以做。」