【士㞗彈系列】《她被寄宿到鹽水男孩的家中》2K15中: K948

V：「重有幾日就要比賽喇，所以身體狀態格外重要，我哋今晚食養生中菜。」就知無咁簡單…
當然我都明白唱歌前係唔應該食炸雞pizza嘅，上到去由我負責擺菜，首先係…杏汁白肺湯？胡椒豬肚湯應該未有咁白，然後係…江瑤柱扒豆苗，西蘭花賽螃蟹，蟲草花蒸竹絲雞，冬菇扣花膠扣海參，蒸海鮮荷葉飯…
一大堆唔係小朋友嘅食物，所以怕且價錢都係十八禁。
我成日會諗一樣嘢，究竟喺中菜入面乜嘢係扣，到底扣肉係點對付塊肉？係花膠扣海參啱吖，定係海參扣花膠先啱？我唯一知道嘅就係福炒扣底入面嘅扣係減嘅意思…
Anyway啲嘢食係好好味嘅，亦第一次食到加工飯入面係有蝦仁又有蝦乾，個湯重要係濃而清極級好飲。
時不時就會同佢哋喺咁嘅環境之下食飯，其實係有啲奇怪嘅，話晒佢哋成班好姐妹攝咗我一條仔入嚟。當佢哋複數存在時我好多嘢都唔做得，基本上要做返一個普通同學咁，就算QQYY當眾惜過我亦唔代表我可以對佢兩個親暱；但久而久之所有人亦已經習慣晒，就連Zilvia都唔會有乜異樣，好似一個大家庭喺度開餐咁。
Y：「係時候做一樣嘢，Uranus妳要換套真鼓嚟打下。」
U：「咁嘅話…會唔會好嘈？」
Y：「會，妳可以試下細力啲，但因為手感上係有啲唔同，妳點都要習慣一下。」
U：「我都明嘅，但係嗰邊無咗部電腦。」要知道電腦有好幾個用途，出譜，打分，較大細聲。




V：「放心，我已經將個譜嘅video滙咗落部iPad度，到時都係會放喺個譜架度畀妳睇住嚟打，重有唔使太執著個大細聲，因為最後係會經咪收音由叉仔調較。」
Y：「重有，由於妳學嘅係一套硬性動作，所以嗰日set鼓一定要set返同呢度一模一樣，呢度套真鼓本身係pair咗嘅，但學校唔係，所以你而家就幫我度晒啲高度同距離，到時係要快速還原。」佢指住我嚟講。
一，二，三，四…總共有七個鼓同兩個腳制…
換咗打真鼓，先唔計大細聲，音感首先唔同晒，成間房好似會同啲鼓聲共鳴咁；佢哋再開始加埋vocal，我終於明耳反到底有幾重要，如果我唔帶耳機就算企喺隔籬都完全聽唔到佢哋唱乜，雖然mix埋晒都夠我聽到一頭霧水。
嚟到呢度，我覺得喺音樂上嘅表達就已經做到晒，剩返嘅修飾就好睇佢哋臨場表現，同埋佢哋會為演出呢兩粒字再加多幾多糖醋油鹽，畢竟佢哋收收埋埋就連當日嘅服飾都唔肯講我聽，雖然我亦唔係話好大興趣。
臨近決鬥，連幽蘭都留到十點幾先一齊走；至於QQ，認真慘慘豬，又要自己一個遊車河，我認衰仔自己搭綠色線走咗，因為…一個人受罪好過兩個人受？而且我覺得我唔喺度嘅話佢哋講八婆嘢係會開心啲…掛。